KHAWTHLIR

National Chung Hsing University (NHCU), Taichung, Taiwan-a professor palite chuan nimin khan Mizoram University an tlawh a; MZU zirlaite, zirtirtute leh hotu dangte nen inkâwm­in, 'Study in Taiwan' chungchang te, research lama thawhhona tur te, MZU hnuaia zirna-in, zirlai, zirtirtu leh alumni-te tana hamṭhatna turte an sawiho. NHCU aṭanga rawn kalte hi Prof. Mumin Chen, Prof. Wen-Ling Deng, Prof. Hannes Bergthaller leh Dr Chien-Teh Chen te an ni.

Assembly session neih zawh takah UDPA changtu deputy chief minister Tawnluia chuan INC member Zodintluang­a zawhna ziaka chhangin, UDPA department hnuaia project thawhna tur sum cheng nuai 3,100 chu hmun danga hman turin pawh lêt a nih thu a tarlang. Dy. CM Tawnluia tarlan danin, sum pawh let cheng nuai 3,100 chu ṭul zawkna avangin pro­ject danga hman tura tih a ni a; sum pawh lêtte chu Finance department-ah pek let (surrender) a ni.

General Administration Department changtu chief minister Zoramthanga chuan Assembly session zawh takah khan independent member C Lalsawivunga zawhna ziaka chhangin, Saitual, Khawzawl leh Hnahthial district-te fûke kimin an kal theihna atan hmalak mek zel a nih thu a tarlang.

2nd Annual Conference of North East Chapter of Association of Surgeons of India (2nd NECASICON 2019) chu nimin khan Aijal Club-ah ṭan a ni a, Health minister Dr Lalthangliana khuallian niin, Mizoramah surgeon indaih lohna a nasat thu a sawi a, "Tunah hian surgeon 27 chauh Mizoramin a nei a, India ram state zingah surgeon nei tlem ber kan nih hial a rinawm," a ti. NECASICON hi June 30, 2018-ah din a ni a, India hmarchhak state panga - Arunachal Pradesh, Meghalaya, Mizoram, Nagaland leh Sikkim an tel a, member 172 an awm mek a ni.