Congress sorkarah overdraft a awm ngai lo - Lalsawta

Congress party chuan nimin khan Congress Bhavan-ah political session an nei a; Finance minister hlui Lalsawta'n thu sawiin, Congress ministry kum 10 kal ta chhungin sum hman tur awm loh vanga Treasury khâr (overdraft) ang a awm ngai lo tih a sawi.

Lalsawta chuan, Congress sorkar chhungin Chief Minister hoin renchem takin sum an hmang a, ram tana thil pawimawh tih ṭhulh chuang loin an kal ṭhin tih a sawi a, "Harsatna thleng phut a awma hman mai tur thlavéng atan sin­king fund (Guarantee Redemption Fund) kum khatah cheng nuai 3,600 dah a ni ṭhin. Congress ministry kum 10 chhung khan pawisa hman tur awm loh avanga overdraft a awm ngai lo. Sorkarah pawisa hman tur a awm tur a ni," a ti.

Ram hruaitu, minister leh MLA-te emaw, official-te pawhin duhsak bik nei emaw, hlauh bik neih vang emawa hmalakna eng pawh an nei a nih chuan an thutiam an bawhchhia tihna a nih thu sawiin Lalsawta chuan, "Dan anga hrem theih an ni. Indian Constitution siamtute hian ram roreltute'n thuneihna dik lo taka an hman a hlau ber a, chuvangin president, governor, minister, judge leh chanvo pawimawh luah pha chinte chu an ṭhuthmun an luah hmain thutiam la ngei turin a phût a ni," a ti a; Constitution-ah rinawm tura intiam vek an nih thu a sawi.

MPCC Communication department chairman Lalsangzuala Hmar pawhin thu sawiin, tun hnaia New Delhi-a AICC meeting-a an tel chungchang a sawi a, "BJP sorkar vung tak anga a kal hi India ramah chhang-kham an tam hle. A bet zawkah ṭang rih mah ila, India ram state hrang hrangah kan party mite an phûr hle. BJP-in India ram a suasam nasatzia mipuiin an hmu chho zel a, NDA sorkar­ah hian rinna tak tak an nghat ngam tawh lo a ni," a ti. Congress party political session-ah hian MPCC secretary Joseph Lalhimpuia leh MPCC Media secretary C Lalhriatpuia ten thu an sawi bawk.