ATC-in College Day an hmang

Aizawl Theological College (ATC) chuan nimin khan an hmunah College Day an hmang a, Synod moderator Rev. R Lalhmingthanga'n hmanpuiin, academic session 2018-19 chhunga zirlai ti ṭha zualte hnenah chawimawina a hlân.

ATC Day lawmnaah hian ATC-a thawkte leh zirlaite bakah, mi pawimawh sàwm bik ṭhahnem tak an tel a; thupui neiin, thupui 'Challenges in our Christian ministry today' tih chu Rev. C Rosiama'n a sawi.

ATC-a hun rei tak zirtirtu ni tawh leh acting principal pawh ni tawh Rev. C Rosiama chuan, mi ṭhenkhatin tunlaia kohhran an duh khawp lohna leh an sawisel dan kawng hrang hrang 11 sawi langin, an sawisel chhante a tarlang a, zahawm tak leh hawihháwm takin kohhran duhkhawp lohnate chu a sawina tur tak leh a sawi hun taka sawi a pawimawh thu a sawi.

Rev. C Rosiama chuan, "Rawngbawltu hian Pathian thu hi tuipui ber ila, ram rorelna thuah te, ei leh bar zawnnaah te, vantlang nunho kawnga harsatna kan ramin a tâwk a nih chuan, zawlnei hna thawka au chhuak tur kan ni. Chanchin ṭha nunpuiin, kohhran leh khawtlang siamṭha khawpin Pathian ram i thlentir ang u," tiin kal khawmte a fuih.

Inkhawmah hian kum­ina ATC zirlai chhuak zinga ṭha ber lawmman Best Outgoing Student Award (Dr. C Biakmawia Prize) chu C Zaihnuna, New Champhai hnenah hlan a ni. ATC hi kum 1907-ah din niin, a tirah chuan tirhkoh zirna sikul a ni a, kum 1994-ah B.D zirna hawn niin, kum 2013-ah Doctor of Theology zirnaah hlânkai a ni. Tun dinhmunah zirtirtu 29 leh thawktu dang mi 32 an awm mek a; kum 2019-20 academic session-ah B.D zirlai 108, M.Th zirlai 56, D.Th. zirlai paruk an awm a ni.