MJA-te'n sorkar hmalakna an tlawh

MJA General Headquarters hruaitute leh Serchhipa MJA member-te chuan nimin khan Serchhip leh a chhehvela sorkar department hmalakna ṭhenkhat an tlawh.

MJA Gen. Hqrs. hruaitute hi president Zonunsanga Khiangte hoin an thawk chhuak a, treasurer C Lalhmachhuana leh secretary pahnih Lal Rinmawia leh Joseph Lalnuntluanga te an ni. Fishe­ries department hmalaknate an ennaah Fisheries officer Zonun­tluangi leh Serchhip District Fish Farmers' Association hotute'n mimal sangha dil hrang hrangte an fanpui.

Zonuntluangi chuan, Serchhip district-ah sangha dil nei chhungkua 1,321 an awm thu sawiin, "Sangha dil siam theihna ram hectare 750-ah hectare 395.685-a zauah sangha dil siam a ni a, department-in sangha khawitute hnenah sangha chaw 50% subsidise-in a pe ṭhin," a ti.

MJA member-te hian Horticulture department hmalaknaa Leng khuaa Center of Excellence pawh an tlawh a, Ser­chhipa Hosticulture officer M Vanlalzami leh a thawhpuite'n dawngsawngin, an hmalaknate an lo hrilhfiah. M Vanlalzami chuan, Horticulture department in Mizoramah Center of Excellence pali a neih thu te, thlai ṭiak hrang hrangte an pek chhuah ṭhin thu te, dragon fruit 60,000 vel leh serthlum 25,000 vel pe chhuak tura an inbuatsaih mek thu te, Serchhip chhehvelah thlasik thlai, a bikin zîkhlûm an thar nasat thute a sawi.