Excise-in Aizawl district-ah October 2019 Chhungin Rs. 1,61,79,155 hù ruihhlo man

Excise & Narcotics department (END) officer-te chuan nimin khan an conference hall-ah crime review meeting an nei a, END commissioner Ngurchungnunga Sailo-in a kaihruai. Kumin October thla chhungin Aizawl district bikah Rs. 1,61,79,155 hù ruih­hlo chi hrang hrang an man thu an tarlang.

Review meeting-ah hian ruihhlo leh a kaihhnawih khuahkhirhna dan, The Narco­tics Drugs & Psychotropic Substances Act 1985 leh Mizorama zu khuahkhirhna dan The Mizoram Liquor Prohibition Act 2019 kenkawhna dante leh an hnathawh dante thlir a ni.

Zu leh ruihhlo man vanga Court-a thawnte chungah an tihsual ang phu tâwka judge leh magistrate-te'n hremna an lo pek ṭhin avangin lawmawm an tih thu an sawi a; mipui, tlawmngai pawl leh sorkar department dangte nen thawhhona ṭha tak an neih ṭhin avangin an lawm thu an sawi bawk.

Mizorama zu khapna leh khuahkhirhna kalpui mekah END chuan Mizo mipuite nen thawhhona ṭha lehzual neih an duh thu sawiin, "Zu leh ruihhlo man a nihin thuhretu neih mumal loh vangin pawi khawihtute dan hmanga hrem theih loh phah a awm fo a; thuhretua ṭan hnial lo turin mipui kan ngen a ni," an ti.

#    Ruihhlo    Man zat

1.    Heroin    Gram 718.576

2.    Ganja    Kg. 67

3.    Cough syrup    Vial 19,932

4.    Alprazolam    Mûm 2,982

5.    Tramadol    Mûm 6,580

6.    Mihring man    51

7.    Case ziah luh zat    32

8.    Ruihhlo man hlutna    Rs. 47,92,725

1.    Rakzu    Lt. 9,581

2.    Zu bilh lai    Ṭin 13,827

3.    IMFL (750 ml)    Úm 279

4.    IMFL (375 ml)    Úm 259

5.    Beer (500 ml)    Can 24

6.    Dawidim    Kg. 315

7.    Mi man zat    84

8.    Case register zat    184

9.    Zu man hlutna    Rs. 1,13,86,430