Notification hmanga tihchhuah MLP Rules cancel a ni - Excise Minister
Excise & Narcotics minister Dr K Beichhua chuan INC member KT Rokhaw zawhna ziaka chhángin, December 19, 2019-a Mizoram Liqour Prohibition (MLP) Rules notification hmanga tihchhuah chu sût (cancel) a nih thu Assembly House a hrilh.
KT Rokhaw chuan, December 19, 2019-a notification hmanga MLP Rules chhuah chu a copy an pek theih leh theih loh a zawt a; Dr K Beichhua chuan, "He notification hi cancel a ni, copy pek tur a awm lo," a ti a, tun dinhmunah MLP Rules a awm lo tih a tarlang.
January 13, 2020 khan chief minister Zoramthanga chuan Mizo Hnam Rûnah zu khapna dan duan mekah rawtna hrang hrang a awm tih sawiin, "Dan hmasa lama lo awm tawh, zupui leh zufáng ang chite kût nía entira pholante a ṭha em, tihte rawtna a awm. Inrâwn tawnna kalpui mek a nih laiin zu zuar leh tur ang lek leka sawina a awm," a ti a; MLP Rules tur chu Cabinet-in a ngaihtuah tur thu a sawi.
December 19, 2019-a MLP Rules ang chuan phalna nei tan chuan - beer leh wine siam leh zawrh theih a ni a, hun bikah tualchhung zu (country liquor) pawh siama zawrh theih a ni. Sorkarin zu dah khawmna tur kudam a siam anga, chuta ṭang chuan phalna neite'n zu an lei thei dawn a ni.
END Minister chuan INC member C Ngunlianchunga zawhna chhangin, tun dinhmunah Excise & Narcotics department hriatpuinain zu/IMFL leina permit pek a awm loh thu a tarlang a, "Tun dinhmunah sorkarin zu leina hmun/dawr siam a tum lo," a ti.