NHM-a thawkte'n conference an hmang

National Health Mission Con­tractual Association, Mizoram (NCAM) chuan nimin khan Dawrpui Multipurpose Centre-ah General Conference vawi khatna an hmang a, Health & Family Welfare Board vice chairman Dr ZR Thiamsanga, MLA-in a hmanpui.

Dr ZR Thiamsanga chuan, NHM hnuaia thawkte harsatna tawh hrang hrang sorkarin a hriatpui nia sawiin, "Kan sorkar hi kum khat chuang kal tawh mah se, hna kan thawh theih hun tak tak erawh thla nga vel chauh a ni a, chuvangin, hmalak vut vut a la har rih a ni," a ti.

NHM hnuaia thawkte hlawh chu lungchhiatthlak a tih thu sawiin ZR Thiamsanga chuan, "Vawiina in thu pass ang angte hi sorkarin a ngaithuah ngun a ngai dawn a, a hlawhtlin theih nan theihtawp ka lo chhuah ang," a ti bawk.

NCAM conference-ah hian NHM mission director Dr Eric Zomawia pawhin thu a sawi a; chawhnuah ro an rél a ni.