ZPM-in AMC manifesto an tlangzarh Kan CM ni lai CM nawntir duh lo chuan MNF vote loh mai tur - Duhoma

ZPM party chuan Aizawl Municipal Corporation (AMC) inthlan tura an manifesto chu nimin khan an pisaah an tlangzarh. Manifesto tlangzarhtu Lalduhoma, ZPM leader chuan, chief minister ni lai CM-tir leh duh lo chuan MNF candidate-te vote loh mai tur a nih thu a sawi.

Lalduhoma chuan, AMC inthlana vote thlâk rualin kum 2023-a MLA inthlan lo awm tur vote kêp a nih dawn thu sawiin, "Aizawl khawpui enkawl tur thlang tur kan nih rualin, MLA inthlan lo awm leh tur a hril thei. Kan CM ngai bawk MLA inthlan leh huna CM atana kan duh loh chuan MNF vote loh mai tur. Kalphung thar, mipui sorkar din duh zawng zawngte chu ZPM candidate-te vote turin ka sáwm a ni," a ti.

AMC inthlanah Serchhip bial by-election lo awm tur pawh vote tel a nih dawn thu sawiin Lalduhoma chuan, "Min lainata min khawngaihtu Serchhip biala vote neih châk tak takte tan AMC hi hun ṭha a ni a, ZPM candidate vote vek turin ka sawm a che u. Inthlan pahnih awm tur hi a inzawm a ni," a ti a; AMC-ah ZPM an chak chuan MLA by-election chu a awlsam tawh tur thu a sawi.

ZPM Leader chuan, MNF-te chu sum tawktarha campaign-ah puhin, "MNF hi hmana cheng sîng nga min tiamtute kha an ni. Kum 10 chhungin a dawng tam berin Rs. 7,800 an dawng. An thutiama rinawm tâwk lote tho kha an ni a, an hming leh an hotupa a la ngai reng. Keini chu an hmanrua ang hmang ve loin, inngaitláwm leh thuhnuairawlh takin i campaign ang u," a ti.

Lalduhoma chuan, eng party pawh an party chakna hmanga tling thei an awm lo tih sawiin, "Mipui puih apiangin an chak ṭhin. Tunah pawh kan innghahna tur chu mipui chakna a ni," a ti a; MNF-in therhlo an hmatheh an hnar phal lo a nih pawhin, anmahni erawh chu inhralh lo turin mipui a chah.

AMC sorkar awm tawhte sum hman dan a langtlang tâwk lo nia sawiin Duhoma chuan, "Sorkarah chuan annual financial statement siamin, sum hman dan tarlan ṭhin a ni. Langtlang sorkar dinna atan a pawimawh. AMC-ah chuan ka hriatsual loh chuan annual financial statement siam a ni lo. Keini chuan kan ngaih pawimawh chu langtlang sorkar a ni a, mi hriatpui ngama sum hman a ngai," a ti.

ZPM manifesto tlangzarh inkhawm hi an vice president Rev. Dr K Thanzauva'n a kaihruai a, general secretary Dr KC Lalmalsawmzauva'n an manifesto sawi zauna hun a hmang a ni.

    Municipal Ward Committee dan anga din a ni ang a, danin a phût angin mawhphurhna leh thuneihna an kutah hlan a ni ang.

    AMC-a chhiah lut zat leh a hmanna kimchang a petu mipui hriat turin puanzar ṭhin a ni ang.

    Thlai thartu leh a leitute kalphung neia an indawrna tur Vegetable Supply Chain Centre siam a ni ang.

    Khawpui chhunga parking fee lâk dan ennawn a, mi tin tan phurrit lo zawnga siamṭhat a ni ang.

    Aizawl khawpui vawn fai leh chei mawi ngaih pawimawh a ni ang a, bawlhhlawh sâwngbàwl dan awlsam siam a ni ang.

    Thiamna inhlan chhawnna leh thiam duh zawng zirna Centre for Innovations & Trainings siam.

    Mipuite himna leh rálmuanna ngaih pawimawh a ni ang a, social security system ruahman a ni ang.

    Mistiri leh thiam bik neite'n an kutchhuakte an zawrhna tur Municipal Emporium siam.

    Aizawl Master Plan mithiamte siam bawhzui tâk lohte hâi chhuah a, ennawn a, a taka chantir tura thawh.

    Khawpui chhung hmun remchang apiangah lirtheia inkalpawh theihna siam a ni ang.