UPC (NEI) Platinum Jubilee lawm

Nimin February 18 kha UPC (North East India) Kohhran missionary hmasa ber Rev. Ellis Luther Scism-a'n Mizoram a luh ní a ni a, UPC tualchhung kohhran hrang hrangte'n an lawm. He ni hi UPC (NEI) chuan an kohhran din ní-ah an hmang a ni.

UPC kohhran kum 70-na hi tualchhung kohhrante'n an remchan dan angin an lawm a, kumin hi platinum jubilee a nih nghal avangin kohhran eng emaw zat chuan awmní khamin, ruai nen an lawm a, zan lama hmang an awm bawk. 

Rev. Ellis Luther Scism hian kum 1948-ah India ram a thleng a, Adoor, Kerela-ah Bible school dinin bul a ṭan. February 18, 1950 (Inrinni)-ah Mizoram a thleng leh a, UPC kohhran a din a; UPC kohhrana baptisma chang hmasa ber leh pastor hmasa ber chu Zakamlova a ni.

UPC kohhranah hian kum 1950-ah member 3,000 an awm a, kum 2019-a General Conference report-ah chuan UPC (NEI)-ah hian district 12-ah member 1,07,254 an awm a; tualchhung kohhran 845 leh preaching point 115 a awm bawk.