KHAWTHLIR

State NSS Cell chuan nimin khan Civil Hospital, Aizawl Blood Bank-ah thisen pek an huaihawt a, Durtlang Higher Secondary School NSS-te'n thisen unit 12 an pe a ni.

Dr King Gunu Gharti, Ṭhuampui, Aizawlin thuhlaril dah khawmna lehkhabu, 'Ittihas' (History) tih a ziah leh a hla phuahte a dah khawmna audio CD chu nimin khan Ṭhuampuia HMS Restaurant-ah MJA president Zonunsanga Khiangte-in a tlangzarh. Zonunsanga chuan, Mizote leh Gorkha-te chu Mizoramah inlungrual takin rei tak an chengho tawh tih sawiin, inngeih taka an chenho zel a pawimawh thu a sawi.

Rubber & Allied Crops Development Board vice chairman Lalrinsanga Ralte, Serlui bialtu MLA chuan nimin khan Vairengteah a biala khaw hrang hranga mite tan MLA fund aṭanga a lei plastic tuizém 211 a  vailiam. Tuizém hi tui litre 1,000 dawng a ni. MLA hian nimin khan Vairengte Dumping Ground leh Vairengte damdawi-in (CHC)-a Morgue House a hawng bawk.

NABARD kaltlanga Livelihood Enterprise Development Programme (LEDP) hnuaiah puan tahtute hmasawnna tur bul ṭanna hun Thenzawlah nimin khan hman a ni a, mi 90-te'n puan design leh rawng chawih chungchang an zir dawn. LEDP hnuaiah hian CodNerc chuan puan tahtu mi 90 tan zirtirtu ruaiin, training thawh thumin an buatsaih dawn a, batch tinah mi 30 zel ni 15 chhung an zirtir dawn a ni.

State Referral Hospital-ah nimin khan Covid-19 vei mi pakhat dah luh a ni a, enkawl dam tawh mi pahnih chhuahtir an ni thung a, hripui vei enkawl mek mi 10 an awm. SRH-ZMC Bulletin tarlan danin, hripui vei enkawl mekte chu Isolation ward-ah an awm vek a, an zinga pahnih chu oxygen pek mek an ni a; ICU-ah enkawl an awm lo.