MZU ramah ram neia inchhál an awm; Ram leiah fimkhur turin mipui chah

Mizoram University (MZU)-a pawl pathum - MZU Teachers' Association, MZU Non-Teaching Employees Association leh MZU Students' Council-te chuan thuchhuah siamin, MZU ram chhungah mimal ram neia inchhál leh MZU ram nék zawnga hma la an awm thu an tarlang a; ram zawrh leh lei chungchangah fimkhur turin mipui an chah.

Pawl pathumte chuan, MZU ram, land lease No. 8 of 1984 (978.326 acres) huam chhungah tunlaiin ram nei anga inchhál leh MZU ramri nék zawnga hma la (encroachment) an awm thu sawiin, "Hei hi keini Joint Action Committee on MZU Boundary chuan lungchhiatthlak kan ti a, kan ngai thu tak hle a ni," an ti.

An tarlan danin, a tìrah chuan MZU ram chu MZU din nan Tanhril khawtlangin ram ruak an pêk a ni a, chuti chung chuan MZU a din hnuah ram nei nia inchhál mimal eng emaw zat awmin, Court-a zualko an awm zui a; chuvang chuan sorkar laipui (MHRD/UGC)-chuan kum 2008 khan mi eng emaw zat hnenah zangnadawmna cheng vbc. 19.72 a pe a ni.

Zangnadawmna pek a nih tawh avangin MZU ram huam chhungah mimal ram neia inchhál an awm a thiang tawh lo tih sawiin MZU-a pawl pathumte chuan, "Hei hi sorkar pawhin ziakin a nemnghet. Hetih lai hian, tun hnaiah MZU ramri nék záwnga hma la leh MZU ram chhunga ram neia la inchhál leh ram la hauh an awm tih hriat a ni. MZU ram chin vawng him turin JAC chu a tàwp thlengin a ding dawn a ni tih Mizoram mipui kan hriattir a ni," an ti.

MZU huam chhung leh a ramri depa ram zawrh leh lei chungchangah fimkhur turin mipui an chah a, ram leitute'n harsatna an tâwk palh a nih pawhin MZU-in mawh an phurh loh tur thu an tarlang.

MZU thuneitute chuan MZU ramri pum hual chhuakin boundary pillar/wall siam a nih thuai theih nan land lease no. 8 of 1984-anga ramri tichiang (demarcate) turin Land Revenue & Settlement department an dàwr mek a; muangchang lo turin LRS department chu an ngen a ni.