Mizoramah voter 8,16,138 an awm

Nimin khan district tinah Mizoram Electoral Roll 2021 tlangzarh a ni. Electoral Roll thara a lan danin, Mizoramah voter 8,16,138 an awm.

Electoral Roll 2021-ah hian January 1, 2021-a kum 18 tling chin thun theih a ni a; Roll thara chuang mi 8,16,138-te chu mipa 3,96,973 leh hmeichhia 4,19,165 an ni. Mizoram pumah service voter 4,824 (mipa 4771 leh hmeichhia 63) an awm mek a; polling station 1,242 a awm mek bawk.

Lawngtlai district-a Tuichawng bial chu Mizorama constituency 40 zinga voter tamna ber a ni a, voter 33,052 an awm a ni.

Electoral Roll ennawnna atan hian Draft Electoral Roll chu November 16, 2020-ah tihchhuah a ni a, nikum December 15 aṭanga kumin January 10 inkarah dilna hrang hrang endik niin, nimin khan Electoral Roll thar ber chu tlangzarh a ni. E.Roll thar chu DEO, ERO/AERO office leh BLO-te hnenah en theih a ni.

Mizoram Electoral Roll thar hi district tinah district election officer (DEO), bawrhsap ni bawkte'n an tlangzarh a ni. Aizawlah chuan DEO R Lalramnghaka'n DC Conference Hall-ah tlangzarhin, political party aiawhte leh tlawmngai pawl hruaitute an tel a; DC-in political party-te hnenah an chan tur a hlàn nghal.

Aizawl district-ah Assembly constituency 12 awmin, polling station 305 a awm a; Electoral Roll tharah hian voter 2,71,422 awmin, mipa 1,27,503 leh hmeichhia 1,43,919 an ni. Draft roll aiin voter 7,128-in an pung a, a punna rate chu 2.70% a ni.

Lungleiah chuan Electoral Roll thar hi bawrhsap V Lalsangliana'n DC Conference Hall-ah a tlangzarh a; tlangzarhnaah Election kaihhnawih sorkar official-te bakah, political party hrang hrang aiawh, MJA, YMA, MUP leh MHIP hruaitute an tel.

Lunglei district-ah hian Assembly constituency pasarih a awm a; voter 95,497 awmin, mipa 47,432 leh hmeichhia 48,065 an ni.

Champhai DEO Maria CT Zuali pawhin an district-a Electoral Roll thar chu DC Conference Hall-ah  a tlangzarh a, political party aiawhte hnenah Electoral Roll copy khat ṭheuh a hlân.

Election officer Lalnunfela Chawngthu sawi danin, Champhai district-ah Assembly constituency pathum a awm a, chu'ngah chuan Khawzawl district-a awm khaw ṭhenkhat chu Champhai North constituency-ah an la awm. Kum hmasaa E.Roll ennawnnaah birth certificate lem 47 man a nih thu leh kuminah 17 man leh a ni a, birth certificate 36 dang pawh rinhlelhawma ngaih a nih avangin chhui zui a ni.

Champhai district-ah hian constituency pathumah polling station 84 a awm a, voter 54,655 awmin, mipa 26,530, hmeichhia 27,697 leh service voter 428 (mipa vek) an ni a, vote nei thar mi 1,653 an awm. Roll tharah hian draft roll (53,120) aiin 1,107-in an pung a, a punna chu 2.08% a ni.

Kolasib-ah chuan DC conference hall-ah DEO Dr H Lalthlangliana'n Electoral Roll thar a tlangzarh. DEO chuan, Electoral Roll hlawhtling taka tlangzarh a nih theihna tura thawktute inpeknaah lawmthu sawiin, "Sorkar siamna kawnga kan chanvo, kan duhthlanna kan hman theuh theihna turin E-Roll-a kan hming chuantir hi kan ngai pawimawh ṭheuh tur a ni," a ti.

Kolasib district-ah hian constituency pathum - Kolasib, Serlui leh Tuirial bialte a awm a, chu'ngah chuan 60,879 awmin, mipa 29,573 leh hmeichhia 31,306 an ni. E-Roll tharah hian ziah luh thar mi 1,962 an awm laiin, mi 907 paih an ni a; draft roll aiin voter 1,055-in an pung a, punna rate chu 1.76% a ni.

Serchhip bawrhsap Kumar Abhishek pawhin DC Meeting Hall-ah Serchhip district tana Electoral Roll thar a tlangzarh. DEO chuan, E.Roll ṭha leh felfai tak an neih theihna tura rim taka thawktu hrang hrangte hnenah lawmthu a sawi.

Election officer Vanlalhma-chhuana tarlan danin, Serchhip district-ah hian general elector 52,137 awmin, mipa 25,594 leh hmeichhia 26,543 an ni a, chu'ng zinga mi 401 (mipa 399 leh hmeichhia 2) chu service voter an ni. Draft roll aiin voter 1,163-in an tam zawk a, an punna rate chu 2.30% a ni.

Lawngtlaiah chuan DC office-ah DEO Dr Andrew H Vanlaldika'n a tlangzarh a, Electoral Roll thar chu political party aiawhte hnenah a hlân.

Lawngtlai district-ah hian Assembly constituency pathum - Tuichawng, Lawngtlai West leh Lawngtlai East-te a awm a, voter 85,151 awmin, mipa 42,393 leh hmeichhia 42,758 an ni. Draft roll aiin voter 1,226-in an pung.

Lawngtlai district-a Tuichawng bial chu Mizorama constituency 40 zinga voter tamna ber a ni a, voter 33,052 an awm a ni.

Mamit district-a constituency pathumah voter 69,357 an awm a, mipa 35,158 leh hmeichhia 34,199 an ni. Voter thun thar mi 2,367 an awm laiin, mi 800 paih an ni a; draft roll aia voter an punna chu 1,567 (2.31%) a ni.

Khawzawlah chuan DC Conference Hall-ah additional DC Lalrohlua'n Electoral Roll thar a tlangzarh. Khawzawl district-ah hian Assembly constituency pakhat - Tuichang constituency chiah a awm a, district chhunga khaw ṭhenkhat chu Champhai leh Saitual district chhunga Assembly constituency-ah an awm a ni.

Khawzawl district (Tuichang constituency)-ah hian voter 16,971 an awm a, mipa 8,500 leh hmeichhia 8,471 an ni. E.Roll-ah hian thun thar mi 631 an awm laiin, mi 309 paih an ni a; draft roll aiin mi 322-in an pung a, punna rate chu 1.9% a ni.