Dik lo taka periodic patta dilnaah Sorkar a inrawlhin kan hria - MPCC

Mizoram Pradesh Congress Committee (MPCC) Media department chuan nimin khan Aizawl Press Club-ah thuthar thehdarhtute an kâwm a; Thingdawl leh Bilkhawthlira periodic patta dik lo taka dilnaah MNF sorkara thuneitu sáng an inrawlh thûk hlea an hriat thu an puang.

MPCC Media chairman Dr Lallianchhunga chuan, Silchar leh Tuipang inkar kawngpui (NH-306) double lane-a siam turin NHIDCL-in survey an tih mek thu a sawi a, "Kawngpuiin a paltlang tur Kolasib district chhunga Bilkhawthlir, Thingdawl leh Kawnpui area-ah mi 165 zet periodic patta dilna Settlement Office, Kolasib-in an dawng a ni," a ti.

MPCC Media Chairman chuan, Bilkhawthlir huam chhunga periodic patta dilna lut zinga mi 16-te dilnaah thil fel lo - VC seal lem leh VCP signature a awm ngei nia hriain Bilkhawthlir Joint VC-in FIR an thehluh thu a sawi.

Dr Lallianchhunga chuan, FIR-a hming leh veng tarlante an chhui zui tih sawiin, "VC seal lem hman leh VCP hming sign sak bultumtu zingah MNF sorkara thuneitu sang an inrawlh thûk hlein kan hria. MNF block treasurer leh a nupui, MNF unit vice president leh a nupui leh MNF unit president nupuite pawh an tel. Heng mite hian Kolasib town area Thingdawl dáiah pawh periodic patta an dil a ni," a ti.

MNF chu an sorkarin zángnadawmna dik lo taka lâkna nen hmehbel turin an awm zel nia sawiin Lallianchhunga chuan, "Tuirial Hydel Project atan mi 48 hnenah cheng nuai 34.06 compensation pek tura tihfel a ni a, kum 1998-a MNF an sorkar khan tuna kan CM chhungkhat laináte leh duhsak zawng dah belh an ni a, mi 1,021 hnenah nuai 2502.02 pek a ngai ta daih a ni," a ti a; hnathawh pawh kum sarih chhung chawlhsan phah a nih thu a sawi.

MPCC Media hotute chuan, zangnadawmna uchuak taka lâk tum vanga Tuirial Hydel Project thawh theih loha a awm angin NH-306 double lane-a siam tura hmalak mek chu tlawlh phah an hlauh thu an sawi a, "VC pass lem hmanga periodic patta diltute hmalak mek hi a tlawlh phah ang tih kan hlau tak zet. Dik lo taka thil tih tumtute dan anga hrem ngei turin sorkar kan ngen a ni," an ti.