Health Minister-in screening point Tihchangtlun dan tur a enfiah

Health minister Dr R Lalthangliana chuan nimin chawhnu khan Lengpui Airport a tlawh a, thlawhtheihna hmanga Mizorama lutte'n Covid-19 an vei leh vei loh enna (screening point) hman mek tihchangtlun dan tur a en.

Hmunhma a rem loh avanga screening team-te'n awm hahchawlhna tur pindan mumal an neih loh thu thawktute'n an lo thlen avangin Minister chuan Lengpui Airport-a MIFCO dawr ruak chu screening team-te chawlh hahdamna atan a ruahman nghal a ni.

Swab sample endikna tur counter pahnih hman mek chu khualzin thleng an pung zel dawna a lan vangin counter pakhat siam belh leh turin hmalak mek a nih thu Minister chuan a sawi.

Dr R Lalthangliana hian Covid-19 veite enkawlna tura ruahman Lengpui Airport bula AYUSH Hospital CCC pawh a tlawh nghal a; sorkar aiawha Covid-19 thupuangtu Dr Pachuau Lalmalsawma'n a ṭawiawm a ni.