Myanmar kuhva lâk luh chungchangah Champhai MZP-in FIR an thehlut

Myanmar aṭanga kuhva lâk luhte MZP hmalaknain truck phur (trip) khatah Rs. 2,00,000 pein Mizoram Police leh Assam Rifles duty-te paltlangpui theia insawi an awm avangin nimin khan MZP Headquarters, Champhai chuan Champhai Police Station-ah FIR an thehlut a; police pawhin a mawhphurtu ber chu nimin khan an man.

Myanmar ram aṭanga Mizorama kuhva lâk luhte truck trip khat zelah Rs. 2,00,000 cháwiin Assam Rifles leh police duty-te paltlangpui thei anga sawi an awm chungchangah hian Champhai Police Station-ah FIR thehluh ngei a nih thu leh a mawhphurtu bera ngaih mi pakhat chu man a nih tawh thu, Champhai SP Rex Zarzoliana Vanchhawng chuan Vanglaini palai zawhna chhángin a sawi a ni.

Kuhva phur truck pakhat zelah thamna Rs. 2,00,000 pea force mi duty-te paltlangpui thei anga insawi hi Lalzarliana, Aizawl lam mi a nih thu leh, MZP hruaitu hlui a nih bakah, political party pakhata inhmang tak a nia thu dawn a ni.

Thu dawn danin, MZP-in kuhva phur truck pakhatah Rs. 2,00,000 zel pein, Assam Rifles leh police-ah an tlangpui thei anga sawi a awm avangin MZP Hqrs., Champhai hruaitute chu sumdawng ṭhenkhatin an dàwr a; Champhai MZP hruaitute erawh chuan an inrawlh ngai loh thuin an lo hrilh.

An pawl hming a rîk avang leh MZP hmanga inthamna a awm anga a lan avangin Champhai MZP chuan Champhai PS-ah FIR an thehlut a ni.