Minister-in EMRS leh leilet a enfiah

Social Welfare minister Dr K Beichhua chuan nimin khan No-aotla khuaa Eklavya Model Residential School (EMRS) sak mek leh Hmaihremzawla leilet a tlawh.

Dr K Beichhua chuan, SEDP chu vawk leh ar vulh ṭanpuina ringawt a ni lo tih sawiin, "Hri léng kárah sorkarin hmasawnna ruhrel siam kawngah hma a la a, UDPA department kaltlangin infrastructure ṭhahnem tak siam a ni tawh,'' a ti a; SEDP hnuaiah Health Care Scheme changtlung tak kalpui a nih thu a sawi.

Minister chuan, EMRS chu tribal-te'n a thlàwna zirna ṭha an dawn theihna tura ruahman a nih thu sawiin, "Central sorkar, Ministry of Tribal Affairs-in min pek a ni a, pawl 6-12 thlenga hawn a ni dawn a, zirlai 480 awm theihna tura ruahman a ni," a ti.

Lo neitute chu taima taka thawk zel tura ngenin Beichhua chuan, Siaha District COVID-19 Food Security Consultative Committee chairman a nihna angin, lo neitute tan hmalak chhunzawm zel an tum thu a sawi.

Dr K Beichhua hi Sericulture director Lalrozama, AH&Vety additional director Dr H Laltlanmawia leh sorkar official dangte'n an ṭawiawm a ni.