District pali-ah thiamthil zirna ṭan

Mizoram páwna hna thawk, Covid-19 vanga an hna aṭanga châwlte tana thiamthil zirna, 'Entrepreneurship Development Programme on Livelihood Generation for Returned Migrant Workers' chu nimin khan Lunglei, Champhai, Serchhip leh Mamit district-ahte ṭan a ni.

Planning & Programme Implementation, Commerce & Industries leh Mizoram Youth Commission (MYC)-te buatsaih training hi Lungleiah chuan Lunglei College multipurpose hall-ah buatsaih a ni a; Lunglei College principal LH Rothanga'n a hawng.

Programme hi ni thum awh tur a ni a, Mizoram sorkara Entrepreneurship Development Scheme hnuaia master trainer pathum - Agnes L Khawlhring, C Lalremruati leh R Lalnunthara te bakah, Industries department mithiamten an zirtir ang.

Champhaiah chuan IPR auditorium-ah training hawnna hun hman a ni a, district bawrhsap Maria CT Zuali'n a hawng. Champhai district-ah hian migrant worker mi 164, mipa 49 leh hmeichhia 115 an awm a, mi 50 tan training buatsaih a ni. Training-a telte hnenah hian t-shirt leh training hmanruate sem a ni.

Serchhipah pawh IPR conference hall-ah Commerce & Industries functional manager Elizabeth-i'n a hawng a, Serchhip College assistant professor Dr Jonathan Lalnunsiama'n migrant worker mi 22-te chu thiamthil zirna atana pawimawhte a hrilhfiah.

Mamitah chuan IPR conference hall-ah IPRO Paul Rokima'n a hawng a; nithum awh tur training-ah hian master trainer Ronald Lalnunmawia Royte-in thil pawimawhte a zirtir ang. Mamit district-ah hian MYC-a inziak lut migrant worker mi 127 an awm a ni.