November 26 & 27 aṭanga hna zawm lote Thawk chhunzawm duh loah kan ngai dawn - Education Minister

School Education minister Lalchhandama Ralte chuan nimin khan a pisaah thuthar thehdarhtute a kâwm a; Federation of Mizoram Samagra (SSA/ RMSA) Employees (FEMSE) member, November 26 & 27, 2019 aṭanga sikul leh pisa kai duh lote chu thawk chhunzawm duh loah sorkarin a ngai dawn tih a sawi. Hetih lai hian, FEMSE chuan November 26-29 chhung mass casual leave lâk chhunzawm an tum.

Lalchhamdama Ralte chuan, FEMSE chu sorkarin a ngaih pawimawh zirlaite hmakhua ngai loah puhin, exam tikhaihlak zawnga hma laa sorkar thu an zâwm duh lo chu pawmzam harsa an tih thu a sawi a, "Mizoram sorkar chuan hreh tak chungin sorkar thu zâwm lo zirtirtute chungah 'action' a lak a lo ṭul ta a, phalna tel loa ni thum an chawlh chhung zawnga an hlawh pek an nih loh tur thu hriattir an ni tawh. Hei bakah hian, November 26-27 aṭanga sikul/office kai duh lo chu sorkar hmalakna ring tâwk loah ngaiin, an hnathawh mekah tui tâwk lo leh thawk chhunzawm duh loah sorkarin a ngai dawn a, show cause notice pek an ni dawn," a ti.

Sorkar thu zâwm lote chhinchhiah a, a ṭul anga report buatsaih turin headmaster, local council/village council leh village education committee-te Minister chuan a ngen a ni. School Education Minister chuan, FEMSE-te'n sorkar kar nana resolution/ultimatum an siam chu November 8, 2019-a Chanmari YMA Hall, Aizawla inkhawmpui an neih ṭuma mi a nih thu sawiin, "Heng an thil ngiat hrang hrang ziahna resolution hi Chief Minister emaw, ka hnenah emaw engmah official-a inhriattirna a awm lo. Chu bakah, sorkar thar, kum khat êm pawh la hmang ṭhaṭhum lo chuan hun hmasa lama an thu lo thlente ngai pawimawhin an tan ngaihtuahna sêngin hma a la mek a ni," a ti.

Samagra-a thawkte'n hlawh mumal taka an lâk theih nan theihtawp chhuah a nih thu sawiin Lalchhandama chuan, "Central sorkarin an hlawh tur a rawn tihtlem avangin tunah hian state sorkarin kum khatah cheng vbc. 27 chuang a sèn belh mek zawk a ni. An thil phût, hlawh tihsan leh zirtirtu hna ruak 70% an hauh chungchang hi tun dinhmunah sorkar tan tihfel a, tihhlawhtlin nghal rum rum theih a ni lo," a ti a; FEMSE-te pawh an nawrh titawp a, dan pangngaia kal leh tura ngenin sorkar chuan an hriattir tawh thu a sawi.

SSA (elementary)-te'n Mizoram sorkar chu an service chungchangah Gauhati High Court, Aizawl Bench-ah an khing tih sawiin, "Court-in a rèl fel hma chuan an chungchanga hmalakna kal mek pawh sorkar tan thutlukna siam theih a ni rih lo. Zirlai naupangte'n dan pangngaia zirna an chhunzawm leh vat nan leh exam pawimawh tak an hmachhawn theih nan Mizoram sorkar chuan a tih tur a tih a ṭul. LC/VC leh VEC hruaitute an huam chhungah zirtirtu atana qualify ngei, sorkar thu zâwm lote aiawh tur November 28-29, 2019 chhungin zawng hmu a, bialtu DEO/DPC hnena thlen turin kan ngenin kan beisei a ni," a ti.

Hetih lai hian, FEMSE hruaitute nimina ṭhukhawm chuan sorkar aṭanga thu hriat an la neih loh avangin November 26-29 chhung mass casual leave lak chhunzawm an rél a, "District hrang hranga FEMSE Council hruaitute leh affilliated association hruaitute engtik lai pawha Aizawl lama tlân khawm thei tura inring renga awm tur a ni," an ti. FEMSE member-te chu Council thuchhuak zâwm turin an hriattir a ni.