Lei lehna leh buhseng kháwl sem

Nimin khan Sihhmuiah leilet neitute hman tur leilehna khawl leh buhseng khawl an sem a ni a, Agriculture minister C Lalrinsanga'n a vailiam. Minister chuan, buha intodelh turin tun aia thar chhuak tam tura nasa leh zuala ṭan lak a nih dawn thu a sawi.

Agriculture Minister chuan, ei leh bàra intodelhna kawngah buh thar tam a pawimawh tih sawiin, "Sorkarin nasa leh zualin hmalak a tum. Buhfai leina tura sum subsidy-a hman tam lutuk ṭhin hi sorkarin a ngaimawh a, tun hma kal dan ṭha lo nia kan hriatte titawpin, tunah chuan buhfai thar chhuah tamna hmuna kan thar chhuahte vaiho kuta dah tawh loin, keimahni ngeiin a hmunah kan leisak dawn a ni," a ti.

C Lalrinsanga chuan, a tak taka thawk chhuak turin minister leh department hmalakna mai a tâwk lo tih sawiin, "Kuthnathawktute an pawimawh ber dawn. Mahni intodelh kan tum ṭheuh chuan kan ṭhenawmte leh kan veng chhungte an intodelh dawn tihna a ni," a ti a; leilet neitute chu an kháwl dawnte thar chhuah titam thei tura hmang ṭangkai a, pek belh leh phúa thawk turin a chah.

Khawl sem chhuah tâkte chu leilet zau hrang hrang hmun 27-a mite hman turin pek a ni a, chhungkaw 570 velin an hmang ṭangkai thei dawn a, ram acre 970-a zau leiletah hman a ni ang. Khawl lei nan cheng nuai 265.50 sên a ni a, sorkar laipui leh Mizoram sorkar sum intum ṭawm hmanga lei a ni.