ZPM thlawp MLA-te'n Hna an thawk tam hman hle - ZPM Secretary General

ZPM chuan nimin khan an pisaah chhung inkhawm an hmang a; an party-a secretary general K Sapdanga'n thu sawiin, ZPM thlàwp MLA-te'n sum a tlem hle chungin hna tam tak an thawk hman tawh tih a sawi.

K Sapdanga chuan, ZPM chu August 26, 2019-ah Val Upa Council-te'n hruaitu lailâwk turte an ruat a, party anga a awm tak tak thla hnih vel chhungin thil tam tak an ti hman tih sawiin, "Pawisa tlêm chung chungin ZPM support MLA-te'n an area-ah hna an thawk nasa hle. Tun hmaa party fund an chhûn luh ṭhin chu duh loin ZPM support MLA-te hian an tih âwm rênga mawiin, kut tling taka an hnathawh hmuh tur a awm hi a lawmawm a ni," a ti.

ZPM thlàwp MLA-te sûlhnu ZPM ṭhalaite'n a buin an siam dawn tih sawiin K Sapdanga chuan, "ZPM support MLA-te hnathawh leh Assembly House-a hlawh tihpun dodal a, ‘An principle kalh a nih thu’ an sawi chu mipuiin beiseina sang tak an neihna a ni," a ti a; ZPM party chuan MLA an thlàwpte chungah lawmthu an sawi tih a tarlang. 

Inkhawmah hian MLA Lalchhuanthanga pawhin thu sawiin, "Kum khat êm pawh sorkarna an la siam loh lai leh SEDP pawh an la sem theih hmaa hlawh tihpun hi a zahthlak hle. Inthlan laiin MLA hlawh zat hre sa an ni a, hlawh tihsan phût leh tur chu candidate chuh ve loh mai awma a ngaih thu a sawi.