Excise-in zu báwm 866 an man

Vairengtea Excise & Narcotics checkgate-a duty-te chuan November 24, 2019 khan zu case (báwm) 866 leh beer báwm 626 an man a, zu phurtute thubuai an siamsak.

Excise & Narcotics department hotute hnen aṭanga thu dawn danin, zu leh beer an man tâkte chu truck pahnih - MN-02 9907 leh MN-01 9786 aṭanga man a ni a, lirthei khalhtu Luminlal (25) s/o Zamkholam, Tolen, Tamenlong district, Manipur leh Seingam Haokip (38) s/o Letpao Haokip, N Molshophai, Churachandpur district, Manipur nia inchhálte man an ni. Zu an mante chu whiskey báwm 621, rum báwm 180, vodka báwm 65, beer (bottle) báwm 320 leh beer (can) báwm 306 a ni.

Excise & Narcotics-te hian November 23, Inrinni khan Aizawl chhehvela phalna nei loa zu siamna hmunte an dap leh a; Rangvamual leh Phunchawng dáiah zu siamna eng emaw zat an tichhia. Rakzu litre 511 leh zu bilh lai ṭín 3,040 an tichhe bawk.