Raw chîn bul ṭanna turin Model Plantation siam rél

Bamboo Development Board chu nimin khan CMO Cabinet Room-ah an chairman Zoram­thanga, chief minister hoin an ṭhu a, hmalakna turte sawihoin, rua chîn bul ṭanna turin Model Plantation siam an rél.

Sorkar thuchhuah tarlan danin, Bamboo Development Board meeting-in rua chîn bul ṭanna turin Model Plantation siam a rèlah hian, Growmore Biotech chu raw chî (seedling) supply-tu tur a ni a, raw chi an pek hmangin kum tharah chhungkaw 100-200 vel enkawl tur Model Plantation siam an rêl a ni. 

Raw chi chînna chu chhungkaw pakhatin buh ṭin hnih leh a chanve vela zau hmun an enkawl dawn a; a hmun vah te, a khur laih te, mangkhawhna turahte sorkar aṭanga puih­na turin sum ruahman a ni a, puihna sum chu ram zau zawng leh khur laih zat azirin bituk a ni ang.

Raw chi chíngtute hmalakna chu society-in an enfiah ang a, sorkar aṭanga puihna sum pawh society kaltlanga pek tura rawt a ni. Raw kára thlai dang chìn theih turte an ngaihtuah bawk. Bamboo Development Board-ah hian MLA K Pachhunga chu vice chairman a ni a, Horticulture Secretary chu member secretary a ni. Nimina meeting-ah hian Board hotute bakah, Planning Board vice chairman H Rammawi leh member secretary JC Ramthanga te pawh an tel a ni.