NISHTHA training buatsaih a ni

SCERT chuan nimin khan an directorate auditorium-ah sikul headmaster leh zirtirtute training pekna tur, National Initiative for School Heads' and Teachers' Holistic Advancement (NISHTHA) an buatsaih a, School Education minister Lalchhandama Ralte-in a hawng.

School Education Minister chuan, ram pum huap programme lian tak - sikul headmaster leh zirtirtute puala training-a telte chuan training lote aia an danglamna an pho chhuah theih ngei a beisei thu a sawi a, "Kan ram leh hnam kal zel turah zirna hi a hnukpui ber a ni a, zirnaah kan hnam pum a ṭhan chuan kan sum lak luh pawh a pung dawn a, lehkhathiam tamna ram apiang a nuam ṭhin a ni," a ti.

Sikul tinah inenkawlna ṭha kalpui a ṭul a, headmaster-in an thawh­puite nen school commu­nity nuam a awm theih nan zirtirtu an fuih thiam a pawimawh tih sawiin Lalchhandama Ralte chuan, "Tih tur leh thawh tur kan pek thiam a ṭul. Discipline lamah pawh tih tur leh tih loh turah chian a ngai a, dan­in min phût angin kan kal em tih te, naupangte tan environment nuam lo a awm thei em tihte kan hre chiang tur a ni," a ti a; zirlaite'n an chan tur an chang em tihte thlithlai reng a ngaih thu a sawi.

Training-ah hian SCERT deputy director Lalduhawmi Thomte-in NISHTHA training a sawifiah a, NISHTHA chu Ministry of Human Resource Development hmalakna a nih thu sawiin, "National resource group-te'n state tin tan training an kalpui a, India ram puma school head leh zirtirtu nuai 40-te training pekna tura duan a ni," a ti.

Lalduhawmi Thomte sawi danin, NISHTHA hmang hian Mizoramah chuan headmaster leh zirtirtu 8,951 training pek tum a ni a, district hrang hrangah vawi 60 training buatsaih tum niin, kumin chhungin training vawi thum  buatsaih hman tum a ni. Training senso chu Samagra Shiksha-in an tum a ni.