Mipa leh hmeichhia intluk tlanna zirho

Institute of Advanced Studies in Education (IASE) chuan nimin khan IASE auditorium-ah mipa leh hmeichhe in­tluktlânna tur sorkar hmalaknate zirhona, 'National workshop on gender equity initiatives for institutional head of va­rious institutes and colleges' an buatsaih a, Law & Judicial department secretary Marli Vankung-in a hawng.

Ni hnih awh tur workshop hawnna inkhawm hi IASE principal Prof. Vanlalhruaii'n a kaihruai a; Marli Vankung chuan, mipa leh hmeichhiate an intluktlang sa reng tih sawiin, "Mi ṭhenkhatin an hriat fiah loh avangin sorkar a inrawlh a ngai ṭhin a, chuvangin, hmeichhiate humhalhna dan ṭhenkhat siam a ni," a ti a; hmeichhe humhalhna dante ṭha taka hmang turin hriat chian hmasak a pawimawh thu a sawi.

Mizoramah gender equity kaih­hnawiha sorkar hmalakna leh dan pawimawhte'n hriat an hlawh lo nia sawiin Marli Vankung chuan, "State dang ang lo takin Mizoramah chuan hnathawhna hmuna mipat hmeichhiatna lam hawia hmeichhiate chhaih kaih­hnawihah complaint a awm lo a, hei hi Mizoramah hmeichhiate an him tihna a nih theih rualin, a ni kher lo thei," a ti. Workhop-ah hian mithiamte'n hmeichhiate dinhmun leh humhalhna dan chi hrang hrang an sawi a, vawiinah chhunzawm a ni ang.