Larsap thusawiah nuai 3 a lang lo - Lalduhoma

Eptu group leader Lalduhoma chuan Larsapin a thusawia 'dream' tih a hmang chu suangtuahna rama cheng mai kan nih thu tichiangtu niin a sawi a, a thusawiah MNF President-in inthlan hmaa a intiamna cheng nuai thum sem a lan loh thu a sawi bawk.

Lalduhoma chuan "Kan Governor thusawiah hian a sawi hmasak ber leh a ngaihpawimawh ber leh a laimu chu kan sorkar hotutena an duhthusam tihpuitlin a ni a... Duhthusam suangtuahna sawi mawiah hi chuan tuna kan hotute tluka chhuanawm hi khawvelah an awm chuangin ka ring lo. Kan Governor pawhin chu suangtuahna leh mumang ram a lo thlen hun hi a lo nghakhlel ve hle mai a lo ni . Chuvangin helai thu hi min tilawmtu ber a ni a. Chutihrualin, min tibeidawngtu ber pawh a ni bawk a ni," a ti.

Duhoma chuan chief minister Zoramthanga chu thu awihawm lo tak tak sawi chingah puhin a thusawi dan chu, "Ram mipui hmusit," nia a hriat thu a sawi a; a thusawi traffic jam awm lohna Aizawl khawpui, kawng chhawng, Tuiriala college din, MZU Western leh Eastern Campus dinte an nghahhlelh tawh thu a sawi.

Duhoma chuan, "Keimahni mau leh rua sira hnawlin ram dang rua leh mau kan sawi mawi," tiin CM chu a puh a, sorkar hnathawk IAS-te pawhin an hna an bansan duh phahna tur khawpa a sawimawi thu leh, a raw sawi ṭhinte chu Meitei hoin an chin tawh thu leh an hausakpui loh thu a sawi a, "Hetiang mai mai hian kan ram mipui hi hmusitin kan sawi fo dawn em?" tiin a zawt.

Duhoma chuan Mizoram chu sum leh pai leh economy hrang hrangah a tlachhia nia sawiin, "Kan ram hi zan thimah kan lut leh mek a, zan a ni a, mumang neih hun a ni," a ti a, hun thar khawvar hun an beisei thu a sawi a, Larsap thusawi inziahna chu 'mumang bu' tiin an pass pui theih loh thu a sawi bawk.