KHAWTHLIR

Vigilance changtu chief minister Zoramthanga chuan ZPM member VL Zaithanzama zawhna chhangin, Lokayukta hnenah thubuai 11 a luh tawh thu Assembly House a hrilh. Zoramthanga sawi danin, Lokayukta-a thubuai lut 11 zinga pasarih chu Lokayukta-a complaint lut a ni a, pali chu Anti Corruption Bureau (ACB) aṭanga lut a ni thung. Thubuai 11 zinga pathum chu chinfel tawh a ni.

School Education minister Lalchhandama Ralte chuan INC member Lalrindika Ralte zawhna ziaka chhángin, December 2018 aṭanga January 2020 chhungin Aizawl khawpui chhung aṭang­in zirtirtu pahnih sawn chhuah (transfer) an nih thu a tarlang. Lal­chhandama tarlan danin, zirtirtu sawn chhuahte chu high school leh higher secondar school zirtirtu pakhat ve ve an ni.

Mizoramin High Court a neihna turah sor­karin eng chenin nge hma a lak tawh tih ZPM member Andrew H Thangliana zawhna chu Law & Judicial minister TJ Lalnuntluanga chuan chhángin, "High Court hran nei turin sorkar sum dinhmun en chungin hmalak mek a ni," a ti.

Champhaia Excise & Narcotics enforcement chuan nimin chawhnu dar 2:30 khan Ngur ram, Ṭiau lui kamah heroin gram 137.6 (hawng 10) an man a, a neitua puh Khualsianlal (19) s/o Vungkhannang leh Thangchintuang (31) s/o Khaikanngo Bulfek, Tidim, Myanmar nia inchhálte an man bawk. Heroin neitua puhte hi NDPS Act, 1985 hmangin thubuai siamsak an ni.

MPC party chuan thu­chhuah siamin, Mizorama Chakma tlawmngai pawl hrang hrangte'n Myanmar 

aṭanga dan loa Mizorama lut an ngaimawh thu prime minister Narendra Modi-a hnena tun hnaia memorandum an thehlut chu Mizote an tham­lohzia tilang chiangtua an ngaih thu an tarlang. MPC chuan, "Kan ram enkawlna leh venhimna chungchangah páwn lam mite lo inrawlh ve hi kan remti ngai dawn lo," an ti.