Larsap hoin Constitution Day lawm a ni

Nimin, November 26 kha India ramin Constitution a neih ṭan ni a ni a, Constitution Day hi Vanapa Hall-ah lawm niin, Governor PS Sreedharan Pillai chu khuallian a ni.

Governor chuan, India danpui chu khawvela dan bu sei ber pawl, danglam bik leh pawimawh bik, democracy inrêlbàwlna hnuaia khawvela ram lian ber dawttua mipuite hnena thuneihna pumhlûm petu a ni tih a sawi a, "India danpui chhungah hian India rama thuneihna tàwp chu mipui kutah a awm tih chiang takin a inziak a, chuvangin, India danpui hnuaia inkaihhruainate hi khua leh tuite'n kan zahin kan zâwm tur a ni," a ti.

Indian Constitution siamtute zingah India ram bung tina chengte aiawh an tel tih sawiin, "India khua leh tui zawng zawng danpui siamnaah kan tel vek. Danpuia pawimawh ber pahnih chu Fundamental Rights - khua leh tui chanvo, dikna leh zalenna humhalh leh, Fundamental Duties - India khua leh tui kan nihna anga kan tih tur leh mawhphurhnate hi a ni," a ti a; Danpui chhunga inziak leh a tum chiang takin Constitution thuhmahruai, 'Preamble'-ah a inziah thu a sawi.

Larsap chuan, Fundamental Rights hriat chian leh ngaihhlut a pawimawh tlukin Fundamental Duties hnuaia khua leh tuite mawhphurhna leh tih turte hriat chiana zawm a pawimawh thu a sawi a, "Khua leh tui zawng zawng, a bikin sorkar hna thawkte'n kan mawhphurhnate ṭhahnemngai taka hlen hi kan tih tur a ni tih kan inhriattir nawn leh a ni," a ti a; mi tinte chu ram inpumkhatna leh siamṭhatna kawngah an phâk tâwka ṭan la ṭheuh turin a chah.

Khualzahawm TJ Lalnun-tluanga, minister of state pawhin thu sawiin, "Khua leh tuite'n kan dikna, chanvo leh zalenna ṭha tak hman a, kan ngaih pawimawh thar leh a ngai a. Kan 'right' kan ngaih pawimawh tluk zetin khua leh tui anga kan tihtur Fundamental Duties ṭha taka zawm kan ngaih pawimawh thar a ngai. Fundamental Duties leh Mizo nun mawi inzirtirnate hi thil inmil tak a ni," a ti.

Constitution Day lawmna hi chief secretary Lalnunmawia Chuaungo-in a kaihruai a, sorkar mi pawimawh, tlawmngai pawl hruaitu, zirlai, dan hremite leh politician-te an tel a; Constitution 'Preamble' chhiar rual a ni. Indian Constitution hi India-in zalenna a neih tirhah a nei nghal lo. Mi 299 awmna Constituent Assembly-in danpui siam hna an thawk a, ni 165 chhungin vawi 11 an ṭhukhawm. August 29, 1947-ah 'Father of the Constitution of India' tia koh Dr BR Ambedkar kaihhruai Drafting Committee din a ni a, November 26, 1949-ah Constituent Assembly ṭhutkhawmah Constitution chu pawm niin, January 26, 1950-ah hman ṭan a ni.

Constitution of India hi part 22-ah ṭhenin, Article 395 a awm a, schedule 12 leh appendice panga awmin, vawi 103 siamṭhat, siam belh leh tihdanglam (amend) a ni tawh.