MLA fund pek chhuah dan A mumal lo - Lalduhoma

Serchhip khaw chhunga Sesah luia MLA fund Rs. 7,00,000 sénga mihring kal kaina tur lei dawh chu nimin khan Serchhip bialtu MLA Lalduhoma'n a hawng. MLA chuan, kuminah MLA fund pek chhuah dan a mumal loh thu a sawi. 

Lalduhoma chuan, kuminah MLA fund pek chhuah dan a mumal loh avangin sum an dawn hun tura an beiseiah an dawn theih loh thu sawiin, "Hei vang hian MLA fund aṭanga hnathawh tura kan ruahman pawh eng emaw zat thawh theih a la ni lo. MLA fund kan dawn hmasak bera mipui tana pawimawh tur he lai hmuna lei dawh ṭha taka zawh theih a ni hi a lawmawm hle a ni," a ti.

Lei hmutute pawhin Rs. 7,00,000 sênga lei dawhah chuan ṭha an tih vek a rin thu sawiin Lalduhoma chuan, "He hna thawktute'n khawtlang tana inpe taka mahni hlâwkna ûm loa hna an thawk hi a lawmawm hle," a ti a; Sesah lei chuan mipui leh MLA dangte tan pawh MLA fund hman danah inelna thianghlim thlen se a duh thu a sawi. Lei hi ft. 55-a sei, ft.5.8-a zau a ni.