GST hlâwkpui ber state kan ni - Taxation department

Taxation department hotute chuan, Mizoram chu India rama state hrang hrang zingah Goods & Services Tax (GST) hlâwkpui ber a nih thu an sawi.

Vanglaini palai zawhna chhangin Taxation department hotute chuan, GST hman a nih hmaa Mizoramin sumdawngte aṭanga sum a hmuh loh tam tak hmuh a nih tawh thu an sawi a, "State páwna sumdawngte'n an thil leina aṭanga chhiah an pek aṭangin 50% kan chang ve zel tawh. VAT hman lai aṭanga hmuh ṭhinah erawh kan tlahniam deuh a, a pumpuiah chuan nasa takin GST hi kan hlâwkpui," an ti.

Taxation department hotute sawi danin, nikuma chhiah an hmuh aiin kumin sorkar kumah chuan chhiah an hmuh chu 25% vela pung tura chhût a ni. Nikuma chhiah hmuh aṭanga chhûtin kumin sorkar kum kal mekah 70% an hmu tawh a, hun a la awm nual avangin 25% velin an khûm thei turah an inngai a ni.