HIV vei mi 21,538 hmu chhuak tawh Kan vaia ṭanrual a ngai - Health Minister

Health & Family Welfare minister Dr R Lalthangliana chuan, October 1990 aṭanga December 2019 thlengin Mizoramah HIV hrik pai mi 21,538 hmuh chhuah a nih tawh thu House a hrilh a, "Hmalakna lian taka kalpui a ngai a, kan vaia ṭan rual a ngai," a ti.

Nimin Assembly session-ah ZPM member Lalduhoma leh MNF member Dr Vanlalṭanpuia te zawhna inṭâwm chhangin Health Minister chuan, National AIDS Control Society chhût danin Mizoram chu HIV/AIDS kai tam lamah pakhatna a nih mek thu a sawi a, "October 1990 aṭanga December 2019 thlenga HIV+ve hmuh chhuah tawh zat chu 21,538 a ni," tiin, HIV vei hmuh chhuah zingah kum 25 aṭanga 34 inkar an tam ber thu a sawi.

Dr R Lalthangliana chuan, Mizorama HIV kai zat mipui za zela chhût nan National Working Group on HIV Estimation a awm thu sawiin, "He group hian state hrang hrang tan standard method hmangin, UNAIDS-in an siam software spectrum chu khawvel pumpuia HIV kai zat chhût chhuah nan hman ṭhin a ni. Chu chu Mizoramah pawh HIV kai zat za zela chhût chhuah nan hman a ni," a ti.

Social media-a HIV kai zat chhût dan a dik tâwk lo deuha sawite a awm ṭhin thu Lalduhoma'n a sawi chungchangah Health Minister chuan, "Keini pawh mi a barakhaih ve a, a ni thei dawn em ni titein ngaihtuahna kan séng. Mahse, min hmuh dan a ni tlat si a, keini tan lo chhût ve vak ngaihna a awm si lo," a ti a; Mizorama HIV/AIDS statistics siamna atana hman chu khawvel huap pawha hman a nih thu a sawi.

Dr R Lalthangliana chuan, a bikin legislature-te'n HIV/AIDS-a Mizoram dinhmun an hriatpui a ngaih thu sawiin, "Health department ngawr ngawr tih chi a ni lo. Synod hruaitu te, MKHC hruaitu te, YMA hruaitute leh doctor inzawmkhawm pawlte pawh ka sawipui tawh. Kohhran ṭhalai hrang hrangte pawhin HIV/AIDS do kawnga hmalaknaa tel ve tura kan sàwmnaah an tel ve theih tur thuin min lo chháng tawh. Hmalakna lian taka kalpui a ngai a ni," a ti.

INC member Zodintluanga zawhna chhangin Health Minister chuan, Mizoram Health Care Scheme-a sorkar leh mimal damdawi-inte inremna chu sorkarin notified rate a siam ang a nih thu a sawi a, "Private hospital-te'n damlote hmakhua ngaiin an rawn zawm a, kan lawm hle. Engkim a fel famkim nghal thei bik lo," a ti a; harsatna a awm chuan engtik lai pawhin thuràwn an lâk theih reng thu a sawi.