FEMSE-in mass casual leave an titàwp

Federation of Mizoram Samagra Employee (FEMSE) chuan November 21, 2019 aṭanga mass casual leave an lak chu nimina sorkar hotute nen an inbiak hnuah, nimin hawhnu dar 2 khan an titawp a, vawiin aṭangin hna an thawk 

chhunzawm dawn.

FEMSE-in nimina an member-te hnena hriattirna an chhuaha a lan danin, nimin chawhma dar 11 khan FEMSE office bearer-te leh sorkar official-te an inbia a ni. Inbiaknaah chuan, FEMSE thil phûtte chak leh mumal zawka bawhzui a nih theih nan Study Group din an rel a, December 2019 ral hma ngeia din tura tih niin, FEMSE aiawhte pawh an tel ang.

Nimina meeting chuan, FEMSE-in mass casual leave an lâk mek an tihtawp chuan FEMSE hruaitute, School Education Minister leh ministry aiawhte inbiakna ruahman an remti a; mass casual leave lak vanga Samagra State Project Director-in a chhuah tawh, 'No work, no pay' leh 'show cause notice' order-te chu hnuh lêt (revoke) a nih theih nan sorkar official, MZP leh MSU-te'n hma an lâk an remti bawk.

FEMSE chuan, mass casual leave an tihtawp chu an thil phût chungchanga an hmalakna tawpna a ni lo tih tarlangin, "Kan duh leh mamawh sorkara kan thlente chak zawka a kal theih nan Study Group din a ni hi ṭha kan ti a, Study Group hmalakna kan duhtawk a tling lo a nih chuan chak zawkin hma kan la zel dawn a ni," an ti.

FEMSE chuan, an hmalakna thláwptu zawng zawng chungah lawmthu an sawi a; mass casual leave an lak vanga harsatna tawkte leh zirlaite chungah ngaihdam an dil rualin, zirlaite tan theihtawp an chhuah zui dawn tih an sawi bawk.

Tarlan tawh ṭhin angin, FEMSE hian hlawh tihsan leh an service ṭha zawka siam phûtin November 21-26 chhung mass casual leave an lak tawh bakah, chawlh chhunzawm zel an tum a; sorkar nen an inbiak hnuah nimin khan chawlh lâk an titawp ta a ni.