Hunpuiah mipui himna atan police leh YMA-in theihtawp kan chhuah dawn - Home Minister

Home minister Lalchamliana chuan hunpui, Krismas leh kumthar lo thleng tur mipuite'n him tak leh thlamuang taka an hman theihna atan police leh YMA-te'n theihtawp an chhuah tur thu a sawi.

Lalchamliana hian nimin khan Aizawl Press Club-ah thuthar theh­darhtute kawmin, kum dang angin hunpui lo thleng turah Mizoramah boruak muanawm awm se an duh thu sawiin, "Mipuite thlamuang takin awm thei se kan duh a ni. Kuminah pawh sorkar phal loh zu leh ruihhlo, halpuah, halmawi leh silai lem a mu kap chhuak theihte kan khap leh a ni," a ti.

Hunpui lo thleng tur atan Central YMA hruaitute nen an inkawm tawh thu sawiin Home Minister chuan, "A remna naah duty indah a, zan lama patrolling-te uar deuh nise kan ti. YMA leh police lamin duty dan turah ruahmanna an siam ang," a ti a, halpuah, halmawi leh silai lem khap kawngah ṭum dang aia khauh an tum thu a sawi.

Home Minister chuan Mizo mipuite chu thuawih thei tak kan nih thu sawiin, "Halpuah leh halmawi khap pawh kan zawm ṭha hle a, kum 2013 ah khawi aṭangin emaw hal a ni leh a, mipui rilru kha khan a tidanglam deuh a ni mai thei. Kuminah chuan sorkar lam aṭang chuan hal tum a ni lo," a ti.

Zu leh ruihhlo avanga hnawksak man an awm chuan bail theih loh tura a theih ang anga ruahmanna kalpui an tum thu sawiin Home Minister chuan, Mizo mipuite thlamuang taka hunpui hmang turin duhsakna a hlan. Lalchamliana chuan hunpui atan ṭum danga hman ngaih lohnaah petrol hman a ngaih dawn bakah duty-te ei leh in tur ngaihtuah a ṭul thu sawiin, "Hemi chungchang hi kan Chief Minister kan sawipui tawh a, ruahmanna siam turin min ti a ni. Kan sum mamawh angte chu CM-in min pe dawn," a ti.

Home Minister ṭawiawmtu DIG Lalbiakthanga Pachuau chuan nikum lamah pawh halpuah leh halmawi hal luite chu an man thu sawiin, "Kan mante chu IPC 188 hmangin thubuai kan siam sak. Hunpui lo thleng tur atan hian ke leh motor hmangin zan lamah patrolling uar taka kalpui tum a ni a, zan nun ti ralmuang lote chu man zel an ni ang," a ti a, temporary beat post pawh engemawzat siam tum a nih 

thu a sawi.