KHAWTHLIR

Mizoram sorkar chuan MPSC chairman atan V Lalremthanga, IAS 2002 batch a ruat a, nimin khan order tihchhuah a ni. V Lalremthanga hi MCS officer ṭhin, IAS-a kai a ni. Mizoram sorkara a pension hmain MPSC-ah member a ni a, chairman ṭhin Rev. Zosangliana Colney a chhuah hnuah, chairman lailâwk atan sorkarin a ruat a, hlawh leh hamṭhatna pawh MPSC member dawn ṭhin pang­ngai a la zui ang. 

Serchhip District Anti Tobacco Squad chuan nimin khan Serchhip­ khawpui chhunga puipunna hmun hrang hrangah vaihlo zûk leh hmuam kaihhnawih dan bawh­chhia an awm leh awm loh an endik a; dan bawhchhia mi paruk man­in, pawisa an chawitir.

Mizoram Home Guards & Civil Defence chuan an din champha vawi 57-na pualin nimin khan MRHGCD headquarters office, Chawlhhmunah blood donation camp an huaihawt a, Aizawl Civil Hospital tan thisen unit 51 an pe a, a petute mipa 47 leh hmeichhia pali an ni. Tuiphai Bial ṬKP-te'n Tarpho BCM Kohhran Hall-ah Lunglei Civil Hospital tan thisen unit 41 pein, petute mipa 39 leh hmeichhia pahnih an ni a; PYD (UPC Mizoram) Kolasib Diakkawn bialin Kolasib District Hospital tan thisen unit 17 (mipa 10 leh hmeichhia pasarih) an pe bawk.

Minister of state K Lalrinliana chuan nimin khan Lungleiah a department chan FCSCA, LAD leh Fisheries department hmunhmáte a tlawh a, an hnathawh dan a enfiah. Minister hi Lung-lei HPC vice chairman Lawmawma Tochhawng, Veterinary & Fisheries Board vice chairman C Lalmuanpuia leh Fisheries secretary Thlamuana ten an ṭawiawm a ni.

Mamit bialtu MLA H Lalzirliana chuan November 23-25, 2019 chhung khan a bial chhunga khaw hrang hrang - Suarhliap, Damdiai, Vawngawnzo, Lengpui leh Lengte khuate a tlawh.