Hunthar Venga lei chê vènna atan Cheng vbc. 10.99 hmuh a ni - DMR Minister

Disaster Management & Rehabilitation (DMR) minister Lalchamliana chuan, Hunthar Venga lei che ṭhin vênna atan sorkar laipui aṭangin cheng vbc. 10.99 hmuh a nih dawn thu a sawi.

Thuthar thehdarhtute zawhna chhangin Lalchamliana chuan, sorkarna an siam veleh Hunthar Venga lei che venna atana sorkar hmasain project an siam chu chief minister Zoramthanga'n Delhi-ah a bawhzui thu a sawi a, "National Disaster Management Authority (NDMA) aṭangin mithiam an rawn kal a, lei che venna atan hian cheng vbc. 20 a ngai turin an chhût a ni," a ti. 

DMR Minister sawi danin, NDMA hian Ministry of Home Affairs (MHA)-ah cheng vbc. 20 an dil a, mahse MHA lamin cheng vbc. 10.99 bak an remti lo. Agreement ziak turin an rawn ti a, Chief Minister-in mamawh dangte chu a ṭul anga ngaihtuah tur a nih thu a sawi avangin, agreement ziah a ni. Sum chu PWD kutah hlan a ni a, PWD-in tender chhuahin hnathawktu tur an zawng dawn a ni.

Lei chêtna hmunah lirthei a kal theihna atan mithiamte'n lung phuarkhawm (gabion wall) siam phawt ṭha an ti a, PWD-te chu estimate siam tura tih niin, cheng nuai 34.22-a thawk thei turah an ngai. A thlang lama lei a tawlh zel lohna atan check dam panga vel siam tum a ni. 

Lalchamliana chuan, DC thuneihnaa tih theih a nih chuan lei chêtna hmun velah chuan hun eng emaw ti chhung hmalakna thar neih a nih lohna atan order chhuah turin Aizawl DC a hrilh tawh thu a sawi bawk.