Speaker-in kawng siam mek a endik

Legislative Assembly speaker Lalrinliana Sailo chuan nimin zing khan Khawhai leh Lungtan khaw inkar kawng siam mek a hmunah a endik a, kawng siamtute chu ṭhahnemngai taka kawng siam tur leh a nih dan tur ang taka hna thawk turin a chah.

Khawhai-Lungtan kawng siam mek hi November 27, 2018-ah siam ṭan niin, contractor chu PC Gupta a ni a, km. 6.65-a thui leh meter 3-a zau tur a ni. Kawng siamna atana sum ruahman chu nuai 435.36 a ni a, March 2020-ah siam zawh hman tura tih a ni. 

Lalrinliana Sailo hian Lungtan khuaah Sailothanga Memorial High School a tlawh a, thawktute nen sikul din­hmun an sawiho. Speaker chuan, sikul naupangte pawh kâwmin, an zirlai ṭha taka zir tura a fuih bakah, nungchang mawi leh ṭha zir chhuak tur leh khawtlang tana mi ṭangkai ni tura an thiamna chhawr tlak neih tum turin a chah a; MBSE exam-a ti ṭhate hnenah lawmman a ruahman tur thu a sawi. Speaker hian Khaw­hai khelmuala pavilion siam thar a hawng bawk. Pavilion hi MLA fund Rs. 6,00,000 sêngin July 2018-a sak ṭan a ni.