Minister-in dan loa zu siamna a tlawh

Excise & Narcotics minister Dr K Beichhua chuan nimin khan Aizawl dáia dan loa zu bilhna hmunte a tlawh a, ruihhlo ngaite awmna Operation Kingdom Ministry (OKM) home, Phun­chawng a tlawh nghal bawk.

Minister Dr K Beichhua chuan Rang­vamuala Excise & Narcotics Outpost tlawhin, thawktute a kâwm a; zu leh ruihhlo dona kawnga rilru leh theihna zawng zawnga thawk zel turin a fuih. OKM Home a tlawhnaah Beichhua chuan, home-a awmte chu taksa leh thlarauah chak taka awm a, sorkar leh Pathian ram zauhna atan intichak turin a fuih a, an mamawh angte a theih ang anga ṭanpui a tum thu a sawi. Minister hi Excise & Narcotics commissioner Ngurchungnunga Sailo leh officer dangte'n an ṭawiawm a ni.

Excise & Narcotics enforcement-te chuan nimin khan Phungchawng leh a chhehvelah rakzu litre 540, zu bilh lai ṭín 2,284 leh zu siamna bungbél eng emaw zat an man a, zu siamna 40 vel an tichhe bawk.