MSP-in Photographic Salon an buatsaih

Mizoram School of Photo­graphy (MSP) leh Photography Club of Mizoram chuan nimin khan MSP Gallery, Upper Republic-ah MSP Photographic Salon vawi hnihna an buatsaih ṭan a, minister of state Robert Romawia Royte-in a hawng.

Photographic Salon (Photo Exhibition & Contest) hian November 30, 2019 thleng a awh dawn a, ni tin chawhma dar 10 aṭanga zan dar 8:30 thlengin tlawh theih a ni ang. Mi 53 kut chhuak thlalak 127 pho chhuah a ni a, a duh tan lei theih a ni. Intihsiakna a ni nghal a, colour section leh monochrome section-ah ṭhenin, a ti ṭha ber ve ve hnenah lawmman Rs. 10,000 leh award pek an ni dawn a, thlalak ṭha zual 15-ah gold award, silver award leh bronze award sem a ni bawk ang.

Robert Romawia Royte chuan, hnam leh sorkarin hma a sawna a changkan poh leh thlalak pawimawhna leh hlut­na a zual ṭhin tih sawiin, "IT hmasawnna ṭhang zelah sorkar pawh thlalak tel lo chuan hna a thawk hlei thei tawh lo. DPR siam leh hnathawh zawh tawh tihchian nan thlalak phût a ni zel tawh," a ti a; MSP-te chu hmasawn tum zel tur leh Mizoram mai ni loin, India hmarchhak huap tala huang zauh turin a fuih.

Hmaichhan leh chanchinbu vela chhuah duh loh tur thil ṭhenkhat, social media a nih vanga ṭawngkam déngkháwng leh mawi lo tak tak hmang duh an awm ṭhin chu pawi a tih thu sawiin Minister chuan, "Mi chêt chhiatna leh thlalak mawi lo pho chhuah ṭhin hi sim a ṭha hle. Hetiang hi  professional photographer chin chuan an ti hauh lo ang tih ka ring. Mi timualpho thei leh an chhiatna thlen thei khawp thlalak thehdarh hi danin a phal lo a, case rit tak awrh theihna a ni," a ti. 

MSP hotupa Malsawm­tluanga chuan, thlalak intihsiak an buatsaihin a tum ber chu, Mizote'n thlalak lama hma an sawn theih nan te, Mizo mipuiin thlalak hlutna an hriat theih nan leh, thlalak hmanga a ṭha lama inzirtirna a awm theih nante a ni tih a sawi.