Blessino Nursing School-in Capping and Lamp Lighting hmang

Blessino Nursing School chuan nimin khan a vawi khatna atan Administrative Training Institute (ATI) auditorium-ah Capping and Lamp Lighting Ceremony an hmang a, Health & Family Welfare minister Dr R Lalthangliana khuallian niin, minister of state TJ Lalnuntluanga khualzahawm a ni.

Health Minister chuan, nurse zirlaite chu tihdam rawngbawl hna thawktu, mahni mihringpuite rawngbawl hna ropui tak thawktute an ni tih sawiin, "Zir chhuah hnuah certificate aia pawimawh zawk chu, thiamna a taka mi dangte rawngbawl nana hman ṭangkai hi a ni," a ti.

Bul ṭan ṭhat a pawimawh tih sawiin Dr R Lalthangliana chuan, Blessino Nursing School chu a bul aṭanga theihtawp chhuaha record ṭha tak nei turin a fuih a; Mizoram chhung chauh ni lo, India ram hmun dang leh ram páwn thlenga chhawr tlak, mi tuarchhel leh mi thiam chher chhuak turin duhsakna a hlân a ni.

Minister TJ Lalnun-tluanga pawhin thu sawiin, "Mihring nunah hlawhtling turin tumruhna, tih tak zetna leh taimakna a pawimawh. In kalkawngah harsatna in tâwk a nih pawhin, bei ṭang ṭang zel ang che u," a ti a; Blessino Nursing School leh an nurse zirlaite chu mi dangte tana malsawmna ni turin a chah.

Capping and Lamp Lighting Ceremony-ah hian Mizoram Nursing Council president Lalchhanhimi, Mizoram College of Nursing principal-in zirlaite chu lukhum a khumtir a ni.

Blessino Nursing School hian Mizoram Nursing Council aṭangin September 13, 2019 khan din phalna an hmu a, Blessino Welfare Society enkawl niin, Indian Nursing Council-in a pawm a ni. Batch khatnaah hian General Nursing and Midwifery (GNM) zirlai 30 an awm a, November 7, 2019 khan zirna an ṭan a ni.