Gas man sang MPYCC-in an dem

Congress ṭhalai, Mizoram Pradesh Youth Congress Committee (MPYCC) chuan thuchhuah siamin, BJP sorkarin eirawngbawlna gas hmangin mipui an rawk mek niin an tarlang a; MNF sorkar chu BJP sorkar tlawn ringawt lo a, mipui duh dan dah lal ber turin an phût.

MPYCC chuan, tun hnaiah eirawngbawlna gas (LPG) man nasa takin a sang tih sawiin, "Kum ruk chhunga ṭum khata a sàn nasat ber ṭum a ni. Uchuak taka gas man tihto hian India ram hmun tin a nghawng a, mi rethei harsa zawk, gas lakna tur sum lu nei lote nasa takin phurrit a siam a ni. BJP sorkarin ram sum leh pai dinhmun tlakchhiat vanga uchuak taka gas man an tisang hi hriatthiam har kan ti hle," an ti.

Congress ṭhalai tarlan danin, khawpui lian - Delhi, Mumbai, Kolkata leh Chennai-ahte tun hnaiah gas bûr khat man Rs. 144 chuang vekin a sang a, Mizoramah chuan Rs. 150-in a pung. India ram economy a hniam tual tual a, ṭhalai hna nei lo an pung a, sorkar leiba a pung zel bawk.

BJP sorkarin thiam takin mipui pawisa hmangin sum a peipung a, ṭul loah mipui an buai phah hle tih sawiin MPYCC chuan, "Gas connection lah Aadhaar card leh bank account nen inthlun zawm a ngai tiin ṭul hauh loah mipui an tibuai hle. Gas lak dan an tidanglam a, gas lak zawng zawngah subsidy an pe lo a, chhungkaw khat tan kum khatah bûr 12 chauh an subsidise a ni," an ti a; fing vervêk takin BJP-in mipui an rawk tih an tarlang.

Congress ṭhalai chuan, Mizo mipui tam ber duh dan hnâwla BJP sorkar tlawn ṭhin MNF sorkar Mizorama a ding chu lungchhiat thlak an tih thu an tarlang a, "An duh duh dana thuhnun theiha awm lo tur leh hlauh nei loa duh loh zawng hnâwl ngam a, mipui duh dan dah lal ber ṭhin turin MNF sorkar kan phût a ni," an ti.