Lunglei district-a khaw 19-ah COVID-19 awareness nei dawn

Lunglei District Task Force on Coronavirus chuan State Level Task Force on Mitigation of Corona Virus-in a phût angin Lunglei district chhunga ramri hrûl khaw 19-ah awareness campaign an buatsaih dawn a, Tlabungah endikna (screening point) siam belh an tum bawk.

Lunglei District Task Force on Coronavirus chu an chairman V Lalsangliana, district bawrhsap hoin nimin khan Lunglei DC conference hall-ah an ṭhukhawm a, Coronavirus chungchanga hmalak dan tur an rél. Lunglei district chhung, ramri hrûla khaw 19-ah COVID-19 chungchang inzirtirna neih an rél a, School Education department leh Higher & Technical Education department-te nen ṭangkawpin zirlaite tan awareness campaign buatsaih a, a ṭul anga thuziak (leaflet) leh video clip siamte an rél a ni.

Meeting-ah hian COVID-19 laka inpuahchah lâwkna, ‘Preparation Plan for Coronavirus Outbreak for Lunglei District’ chu Lunglei chief medical officer Dr Thani Pachuau-in a sawifiah a; ramri kaltlanga veivâk leh khualzinte endik hna kalpui mekah February 16, 2020 thlengin mi 118 endik tawh a ni a, COVID-19 kai hmuh a la ni lo tih a sawi.

Thuneitute ṭhukhawm chuan, COVID-19 endikna hmun pakhat siam belh an rél a, screening point siam belh tur ṭul angte buaipui turin Tlabung SDO(C) Lalsanglura kaihhruai Sub-Divisional Task Force on Coronavirus din an rêl a ni.

Lunglei district-a Coronavirus kai hmuh chhuah an awm palha rang taka hma latu tur ‘Rapid Response Team’ siam a ni a, a kaite enkawlna tur Isolation Ward pawh ruahman tawh niin, Lunglei Civil Hospital-ah khum panga leh Tlabung Hospital-ah khum pathum ruahman a ni tawh.

Lunglei District Task Force on Coronavirus hian July 2020 thla thlengin thla tin ṭhutkhawm an tum a ni.