Civil service-a Mizo kan tling thei lo hi Kan enliam mai dawn lo - MYC Chairman

Mizoram Youth Commission (MYC) chairman Dr Vanlalṭanpuia, MLA chuan Mizo ṭhalaite all India civil service-a an tling thei lo lutuk chu MYC-in an en liam dawn loh thu a sawi a, "Lehkhathiam thei lo zawkte tan pawh hma kan la dawn,"  a ti.

Dr Vanlalṭanpuia hian nimin khan a pisaah thuthar thehdarhtute kâwmin, IAS coaching lamah na takin MYC-in hmalak ṭul a tih thu a sawi a,  "Mizo zinga IAS tling tawhte leh civil service lama tawnhriat neite sáwmin consultative meeting kan nei dawn. Civil service-a Mizote kan tling thei lo lutuk hi kan enliam mai mai dawn lo," a ti a; ngaihtuahna thar nen civil service-a Mizote an tlin theihna atan hma an lak dawn thu a sawi.

Delhi-a coaching academy hrang hrangte tun hnaiah a tlawh thu sawiin MYC Chairman chuan, "Coaching academy-te chuan all India civil service hi Mizoram leh hmarchhak state dangte chuan kan tlin tawh lo hialah an ngai. Competitive rilru chu Aizawlah kan siam ngei ang a, mahse, coaching class ṭhaa páwng intirh ngawt chu mi an hnual phah zawk thei. Chuvangin, uluk takin Mizote civil service-a kan tlin theihna tur hi ngaihtuah a ṭul a ni," a ti.

Dr Vanlalṭanpuia chuan, Alternative Learning System (ALS), New Delhi leh MYC-te'n IAS online coaching an kalpui ṭhin chu tihtawp a nih tawh thu sawiin, "Delhi aṭangin online hmangin ṭawng rang tak takin television kaltlangin lecture an pe a, awmzia a awm tak tak thei lo. IAS online coaching atan hian cheng nuai 200 chuang sèn a ni tawh a, leibá cheng nuai 40 vel a awm mek, IAS tlin phah an la awm lo," a ti a; mithiam an ràwnte'n sum sên leh a hlawhtlinna a inmil loa an hriat avangin ALS nena inremna tihtawp a nih thu a sawi.

MYC Chairman chuan, IIT-JEE/NEET atana online coaching erawh kalpui a la nih thu a sawi a, "Online coaching hi chhimtu an tlahniam sâwt hle. Mahse, kum hnih chhung atan agreement ziah a nih avangin kan la kalpui rih a ni," a ti.

Mi chhawr duh leh hna thawh tur duhte tan online job portal an siam dawn tih sawiin Vanlalṭanpuia chuan, "Mizo ṭhalai lehkha zir mek zingah an hun âwla hnathawh tur duh, thawh tur hre mai lo tam tak an awm. Chu'ng mite tana awlsamna pe a, anmahni pui turin job portal hi kan siam dawn. Job portal aṭang hian thawh tur duh leh thawktu duhte'n an duh zawng mi an zawng thei ang," a ti a; job portal chu a ṭha thei ang bera siam an tum thu a sawi. 

Dr Vanlalṭanpuia chuan, MYC chu kaih­hruaina danah chuan Mizoram pum tan tih a nih thu sawiin, "MYC chhawr hi an tlem hle. Coaching tlem kan pe a, chumi chhawr phâk chu lehkhathiam zual an ni. MYC chhawrtu hi Mizo ṭhalai 1% vel bak an ni lo. Chuvangin, entrepreneurship lamahte pawh theihtawp chhuah kan tum a, MYC hi Mizo ṭhalai tam takin chhawr se kan duh. Ṭhalaite tan a tak taka thawk turin kan inbuatsaih mek a ni," a ti. 

Zawhna chhangin MYC member Dr C Lal­sangzuala chuan Mizo­ram khaw hrang hrangah survey an neih dawn thu sawiin, "Mizo ṭhalaite'n enge an thiam, enge an tana eizawnna atana ṭha ang. Eng lam hi nge kalpui ila ṭhalaite'n an hlawkpui ang tihte kan zirchiang dawn," a ti a, survey-a an thil hmuhchhuah aṭangin Mizo ṭhalaite tan ruahmanna an siam tur thu a sawi.

MYC hian sorkar kum kal mekah hlawh leh office inrêlbàwlna tur senso tel loin budget cheng nuai 500 a nei a, infrastructure lama  hma­sawnna hna thawhna tur cheng nuai 900 dang an nei bawk a; hmuh belh zel an inbeisei.

Ruahmanna an siam dan chuan, Aizawlah office cum coaching centre leh youth centre sak a ni dawn a, Lunglei leh Serchhipah coaching centre siam a ni ang. December 20, 2019-ah SEDP Incentive Cash Award siam a ni dawn a, category hrang hrangah cheng nuai 45 vel sem ral tum a ni.