Lawngtlai Dist. MJA-in enfiah

Lawngtlai District Hospital-a ni zung chakna (solar energy) hmanga kawlphetha siam chhuahna tur kum 2015-a enchhin tawh, tun thlenga la hman theih loh chu nimin khan Lawngtlai district MJA-te'n an enfiah.

Damdawi-ina thawkte chuan, solar power chu Health & Family Welfare department-in ZEDA hotute enfiah turin an beisei mek tih an sawi. MJA-te chuan, district hospital tana thil ṭangkai tak tur hman theih loha a awm reng chu thuneitute'n chak zawkin ngaihven se an duh thu an sawi ve bawk.

Solar energy hmanga kawlphetha pek chhuahna tur hi Ministry of New and Re-Newable Energy aṭanga hmuh, EMMVEE Photovoltaic Power Pvt. Ltd., Bangalore-te'n an bun a ni a, July 2015-ah bun zawh niin, enchhin nghal a ni. Enchhinna chu a hlawhchham a, chumi hnuah mumal taka buaipui chhunzawm a ni lo.