Green Mizoram Network kum 10-na lawm

Green Mizoram Network (GMN) chuan kum 10 an tling a, an kum 10 tlin (tin jubilee) hi nimin khan Aijal Club-ah an lawm a, Environment, Forest and Climate Change (EFCC) minister TJ Lalnuntluanga'n a hmanpui.

TJ Lalnuntluanga chuan, Pathianin khawvel a din tirhin mihringte, nungcha leh thing leh maute chu lungrual taka chêng ho turin a dah tih sawiin, "Sik leh sá danglam zel vanga kan chenna khawvel chhe mek hian khawvel a tibuai hle a, Mizoram pawh kan bâng tawh lo. Mi zawng zawng kan ṭhanharh a ngai a, pawl ṭhangharh sa GMN hian zirtirna nasa lehzuala in pek a ṭul a ni," a ti.

GMN president VL Hruaizela Khiangte chuan, tlawmngai pawl, sik leh sa leh nungchate humhalhna lama inpete thawhho a pawimawh tih sawiin, GMN chuan ramhmul vawnhim a nih theih nan eng pawl pawh an thawhpui thei reng tih a sawi.

Jubilee lawmnaah hian thing leh mau leh nungchate humhalhna lama hma la ṭha nia an hriat mi pathum - C Lianthanga, Dr C Lalhmingliana leh Keihawla te hnenah chawimawina an hlan a ni. GMN hi kum 2009-ah din a ni a, thing leh mau, ramsa humhalh a ṭulzia mipui hnena zirtirtu pawl niin, khawpui leh thingtlang hmun hrang hrangah awareness programme an buatsaih ṭhin.