Sairang Dinthar Vengin Kolabari hmuna sipai dah lo turin ngen

Sairang Dinthar Venga tlawmngai pawl hrang hrang hruaitute tun hnaia ṭhukhawm chuan, an village council huam chhunga Kolabari hmunah sipai hmunpui dah lo turin sorkar an ngen.

Dinthar Veng NGO-te chuan, Kolabari hmunah sipai hmunpui dah an duh loh thu V/C-te nen vawi eng emaw zat sorkarah an thlen tawh tih  sawiin, "Kan duh lohna thu sorkara kan thlen avang hian sorkar pawhin min ngaih pawimawhsak turah kan ngai. Amaherawhchu, September 9, 2019 khan sipai dah turin order a tichhuak a ni. He order hi kan hriat veleh sût tura ngenna Chief Minister zahawm tak hnenah kan thlen a ni," an ti.

Sipai hmunpui dah tura sorkar inbuatsaih turin November 13, 2019 khan order chhuah hnan an nih thu tarlangin Dinthar Veng NGO-te chuan, "Kan theihtawpin, a tawp thlengin hei hi kan dodal tlat dawn. A ṭul dan azirin Supreme Court thlengin kan thlen ve ang. Hetiang duh lo chunga inbarhluih hi ná kan ti em a, Zoram mipui hnenah kan lungawi lohna kan puangzar ta a ni," an ti. Order chu sûtsak leh turin sorkar an ngen nawn leh a ni.