Mizo ṭhalaite Japan-a hna thawh theihna tur hawng

Mizo ṭhalaite Japan-a hna an thawh theihna tura programme ruahman, Technical Intern Training Programme (TITP) chu nimin khan Agriculture department conference hall-ah hawn a ni a, Dr ZR Thiamsanga, MLA-in a hmanpui.

TITP hawnna inkhawm hi Mizoram Foundation Movement (MFM) director R Vanlalzauva'n a kaihruai a; Dr ZR Thiamsanga chuan, Mizo ṭhalaite eizawnna tur kawng ṭha tak buatsaih a ni chu lawmawm a tih thu sawiin, "Khawvela ram changkang ber leh hriselna ngai pawimawh Japan rama kan ṭhalaite'n eizawnna mumal an neih theihna tura ruahmanna awm ta mai hi a lawmawm a, India prime minister Narendra Modi leh Japan prime minister Sinzo Abe ten thawhhona thuthlung an ruahman dun aṭanga lo piang a ni," a ti.

PL Liandinga pawhin fuihna thu sawiin, "Programme rintlak leh ṭha, kan ṭhalaite'n eizawnna mumal an neih theihna tura chhawp chhuah a ni chu a lawmawm hle a ni," a ti a; ṭhalai kalkhawmte chu hun remchang ṭha an neihte bawhpelh lo turin a fuih.

TITP hnuaiah hian India ṭhalai, technical skill neite Japan ramah internship programme an kal thei dawn a, kum nga chhung an thiamnate an han hman hnuah India rama let leh tura beisei an ni. Chutih rualin, mahni inzira hmasawn zel duh tan exam hrang hrang paltlangin visa pawh pawhsei zel theih dan ruahman a ni.

He scheme atan hian Japan aṭangin Japanese ṭawng zirtirtu tur India ramah an dah dawn a, thla riat chhung Aizawlah ṭawng an zir hnuah New Delhi-ah exam an hmachhawn ang. Exam-a tlingte chu thla hnih chhung New Delhi-ah Japanese zingah an training leh dawn a, chuta ṭang chuan Japan ramah an kal thei dawn a ni. Aizawla thla riat chhunga training fee chu Rs. 50,000 a ni ang.

MFM tarlan danin, Japan ramah hian minimum wages a sáng a, Mizo ṭhalai Japan rama thawk thei turte chu thla khatah India pawisain Rs. 1,00,000 vel an hlawh nghal thei dawn a ni.