ZPM ṭhalaite'n Mizoram leh Assam Ramri chingfel turin Larsap an ngen

Zoram Peoples' Movement (ZPM) party ṭhalai hruaitute chuan nimin khan Raj Bhavan-ah Governor PS Sreedharan Pillai an kâwm a, Mizoram ramri chinfelsak turin an ngen.

ZPM ṭhalai hruaitute hi Larsap an hmuhnaah hian an president Malsawmzuala hoin an kal a ni. Malsawmzuala chuan, Mizoram leh Assam ramri buai chu hun rei tak aṭanga awm tawh, buaina pawh a chhuah fo tawhna a nih thu hrilhin, ramri buai chu chinfel thuai a ṭul thu a sawi a ni.

ZPM ṭhalai hruaitute chuan, tun hnaia Prime Minister nena an inkawmnaah, Mizoram tana hmasawnna tura a beihna chu ropui an tih thu PS Sreedharan Pillai chu hrilhin, "Sorkarin kawng hrang hranga an hmalakna leh an policy neihte zir chiangin Zoram mipui tana chhenfâkawm a nih theih nan hma kan la ṭhin. Chumi chungchangah chuan ngenna tláwm tak a hnuaia tarlante hi i hnenah kan thlen a ni. Hengte hi tih hlawhtlin a nih theih nan hma min laksak turin kan ngen a che," an ti.

•    Mizoram leh Assam ramri buai chingfel turin

•    Dan loa Bangladesh mipui Mizorama lut rûte vèn leh tihtawp a nih theih nan Mizoram Maintenance of Household Registers Bill, 2019, Mizoram Assembly session March 18, 2019-a pass tawh pawmpui turin.

•    Indo-Bangladesh leh Indo-Myanmar-a insumdawn tawnna tihchangtlun nana hma la turin.

•    Mizorama international boundary venhimna tihchakna atana hma la turin.

•    Mahni duh thua Mizoram chhuahsantu Bru, tuna Tripura-a refugee camp-a awm mekte zinga a tam zawk chu Mizorama lêt duh tawh lo an nih avangin, Mizorama lâk lêt hna October 3, 2019 aṭanga November 25, 2019 chhunga thawh bâk thawk chhunzawm a nih lohna atana hma la tur leh, Tripura state-a awm hlen tura hma laksak turin.