KHAWTHLIR

Environment, Forests & Climate Change department chuan November 26, Thawhlehni khan an department officer-te pualin PCCF Conference Hall-ah 'Development of training modules & awareness materials on climate change' tih thupui hmangin training an buatsaih a, district forest officer (DFO) chin chung lam officer eng emaw zat an tel. He hunah hian IPE Global Ltd., New Delhi-a consultant Dr Satapathy leh additional director (Environment) Anand Kumar te resource persons an ni.

DIET, Aizawl chuan nimin khan 'Awareness programme for school community members on prevention of drug abuse under NAPDDR' an buatsaih a, Aizawla local council, YMA, MUP, MHIP, kohhran ṭhalai pawl, SMC, PTA, BRCC leh CRCC aiawhte a tel. Resource person Dr Chawnglungmuana (SHALOM), Dr Samuel Lalzarlawma (LIFCODE), Lalromawii Lailung (DIET) leh F Lalhlupuii (DIET) ten thil pawimawhte an 

zirtir a ni.

Mizoram Pradesh Congress Committee (MPCC) chuan naktuk chawhma dar 11 hian Vanapa Hall kawtah Citizenship Amendment Bill (CAB) duh lohna leh dodalna an buatsaih dawn a, political party leh NGO hrang hrang hruaitute pawh an sawm. Mizo hnam leh sakhaw humhim a nih theih nan CAB dodalnaah tel vek turin Mizo zawng zawng an sáwm a ni.

Pathianni chhuak chanchinbu Zalen chuan vawiin hian Aijal Club-ah an kum 15 tlin an lawm dawn a, hemi pah hian Mizo of the Decade atana an thlan hnenah lawmman an sem nghal ang.

Governor chuan tun hnai khan notification chhuah­in Mamit District Hospital chu khum 30 awmna aṭangin khum 100 awmnaah tihchang­tlun tur a nih thu a tarlang.