Ramri chungchanga Mizoram sorkar Hmalakna MSU-in lungchhiatthlak an ti
Mizo Students' Union (MSU) chuan thuchhuah siamin, Mizoram ramri chungchangah Boundary Commission din turin sorkar laipui an inhuam viaua a lan laiin, Mizorama sorkarna chang tawhte'n chinfel tumna tak tak an la nei lo nia a lan thu leh, lungchhiatthlak an tih thu an tarlang.
MSU chuan, Mizoram leh Assam ramria harsatna chinfel a nih theihna turin hma an la tawh ṭhin a, consultation meeting leh seminar-te buatsaihin Boundary Commission din a nih theih nan Mizoram sorkarah ngenna an thlen tawh ṭhin tih an tarlang a, "Mizoram leh Assam ramri buaina hi chinfel a nih theih nana hma la tur Boundary Commission din a nih thuai theih nan chak taka hma la turin Mizoram sorkar kan ngen a ni," an ti.
MSU tarlan danin, March 2005-ah Mizoram Legislative Assembly session-ah MNF member B Lalthlengliana resolution, 'Mizoram leh a ṭhenawm state-te ramri chinfel ngai laite chingfel turin sorkar laipuiin Boundary Commission din thuai rawh se' tih lungrual taka pass a ni. Mahse, Assembly-a resolution pass chungchangah tun thlengin Mizorama sorkar ding tawhte'n hmalakna tak tak an nei lo a, Boundary Commission din turin sorkar laipuiah hmalakna mumal a la awm lo.
November 28, 2018 khan Joint Action Committee (JAC) hmingin Prime Minister hnenah Boundary Commission din turin memorandum thehluh niin, Union Home Minister pawh memorandum copy pek a ni a; memorandum-ah chuan Mizorama political party-te leh tlawmngai pawl president ṭheuhin hming an ziak a ni.
Memorandum chhàn lêt nan Ministry of Home Affairs, North East Division chuan Mizoram sorkar hnenah Boundary Commission din chungchanga a ngaihdante ziaka thlen turin a lo hriattir tawh (Letter no. 11012/33/1995-NE.IV). Mizoram sorkarin chhànna a pek loh avangin MHA North East Division chuan Mizoram sorkar chu Boundary Commission din chungchanga a ngaihdan sawi turin vawi nga hriattir nawnna kumin (2019) chhung ringawtah February 20, April 10, May 9, August 16 leh September 24-ahte a thawn leh tawh bawk.