HIV leh Syphilis beihpui thlâkna tur Lawngtlai DC-in a hawng

Lawngtlai DC Sha­shan­­ka Ala chuan November 26, Thawh­lehni khan Lawngtlai district-a HIV leh syphilis (saihri) dona beihpui thlâk tur Lawngtlai Chief Medical Officer pisa conference hall-ah a hawng a; HIV enfiahna hmanrua vawn ṭhatna tur mini fridge thar Health sub-centre pathum hnenah a hlân nghal.

Shashanka Ala chuan, HIV leh syphilis do beihpui thlâk tur chu a hlawhtlin ngei theih nan thawktu zawng zawngte ṭhahnemngai taka thawk turin a chah a, "A bik takin, health worker-te leh ASHA-te a hmuna thawktu an nih avangin mawh an phur thûk hle a ni," a ti.

Lawngtlai Bawrhsap chuan, HIV leh syphilis do turin hmanraw awm thei zawng zawng hman vek a ṭul thu sawiin, "Damdawi hman sual leh natna darh zel tur ven kawngah theihtawp chhuah a ngai a, mipui a tam thei ang berin thisen an enfiahtir a ngai," a ti a; HIV hrik pai sâa nau piang an awm lohna tura hmalakna chu ngaih pawimawh leh zual a ṭul thu a sawi.

Health department, Mizoram State AIDS Control Society (MSACS) leh World Vision India-te chuan Lawng­tlai district-a khaw 35-ah HIV leh Syphilis beihpui thlakna an kalpui dawn a; campaign-ah hian HIV/AIDS chungchang zirtir bakah, HIV kai leh kai loh endik te, HIV kai hmuh chhuah an awm chuan enkawlna an dawn ngei theihna tura hmalakte a tel.

Campaign hmang hian Lawngtlai district-a nu, nau pai zawng zawngte HIV leh Syphilis an vei leh vei loh enfiah vek te, vei an awm palh pawha an fate an kai chhawn lohna tura enkawl leh hmalakte a huam bawk. Lawngtlai DC-in HIV endikna hmanrua vawn ṭhatna tur mini fridge a sem chhuah chu sub-centre 10-te hnenah pek a ni. Beihpui thlakna hi kalpui mek a ni a, khaw panga tuam tawhin, mi 95 thisen an endik tawhah HIV hrik pâi hmuh an la awm lo.