Education Minister-in MBSE a tlawh

School Education minister Lal­chhandama Ralte chuan nimin khan Mizoram Board of School Education (MBSE) pisa a tlawh a; MBSE chu academic authority a nih avangin, a nihna ang taka ṭan la turin thawktute a fuih.

Minister pual hian MBSE con­ference hall-ah inkhawm buatsaih a ni a; Lalchhandama Ralte chuan, MBSE hna chu langsar si loa pawimawh tak, mi rinawm, thurûk vawng thei, mahni hnaa inpete awmna tur a nih thu a sawi.

Education Minister chuan, Mizo­ram zirnaah puanven sawi chhìn a ngai tih sawiin, "MBSE hi academic authority a nih angin ṭan in lak zel a ṭul. Mizo nula leh tlangvalte national level-ah an lan theih nan syllabus nge, exam kalphung tihdanglam ngai awm tih hi ngaihtuah chian a ngai a ni," a ti. 

School Education Minister hi Human Resource Development Board vice chairman L Thangmawia  bakah, department official-te'n an ṭawiawm a ni.